၂၀၂၆ ခုနှစ်အတွက် ကမ္ဘာ့ နေထိုင်ဖို့အကောင်းဆုံးနိုင်ငံ ၂၀ ထဲမှာ ထိုင်း ပါဝင်

ထူးခြားတဲ့ ဗိသုကာလက်ရာတွေ၊ အမြော်အမြင်ရှိတဲ့ မြို့ပြစီမံကိန်းတွေနဲ့ ဒီဇိုင်းပိုင်းဆိုင်ရာ ကြွယ်ဝတဲ့ ယဉ်ကျေးမှုတွေကြောင့် ထိုင်းနိုင်ငံဟာ Architectural Digest ရဲ့ ၂၀၂၆ ခုနှစ်မှာ နေထိုင်ဖို့အကောင်းဆုံး နိုင်ငံပေါင်း ၂၀ စာရင်းမှာ ပါဝင်လာပါတယ်။အနောက်ဥရောပနိုင်ငံတွေနဲ့ ယှဉ်ရင် နေထိုင်မှုစရိတ် သက်သာတဲ့အတွက် ထိုင်းနိုင်ငံဟာ အွန်လိုင်းကနေ အလုပ်လုပ်သူတွေ (digital nomads) ကြားမှာ ရေပန်းစားတဲ့ နေရာတစ်ခု ဖြစ်လာပါတယ်။ ဒီဇိုင်းကို နှစ်သက်သူတွေအနေနဲ့ လှပသေသပ်တဲ့ ဗုဒ္ဓဘာသာ ဘုန်းတော်ကြီးကျောင်းတွေအပြင် ဘန်ကောက်မြို့မှာရှိတဲ့ ထိုင်းဖန်တီးမှုနဲ့ ဒီဇိုင်းစင်တာ (TCDC) လိုမျိုး ခေတ်ပြိုင်ဒီဇိုင်းပြခန်းတွေကိုလည်း လေ့လာနိုင်ပါတယ်။ ဘန်ကောက်မြို့ကို ယူနက်စကို (UNESCO) က ဒီဇိုင်းမြို့တော်အဖြစ် အသိအမှတ်ပြုထားပြီး အလုပ်ရုံဆွေးနွေးပွဲတွေ၊ စမ်းသပ်ပြသမှုတွေနဲ့ အစားအသောက်ဈေးတန်းတွေ ပါဝင်တဲ့ ASA Architect Expo ၊ STYLE Bangkok နဲ့ Bangkok Design Week စတဲ့ ပွဲကြီးတွေကိုလည်း ကျင်းပလေ့ရှိတဲ့အတွက် နိုင်ငံတကာက ဧည့်သည်တွေကို ဆွဲဆောင်နိုင်ပါတယ်။ဒီစာရင်းမှာ ထိုင်းနိုင်ငံနဲ့အတူ ပါဝင်တဲ့ တခြားနိုင်ငံတွေကတော့ ဆွစ်ဇာလန်၊ ဂျပန်၊ အမေရိကန်၊ သြစတြေးလျ၊ ဆွီဒင်၊ ဂျာမနီ၊ ယူကေ၊ နယူးဇီလန်၊ ဒိန်းမတ်၊ ပြင်သစ်၊ နယ်သာလန်၊ စင်ကာပူ၊ အီတလီ၊ တောင်ကိုရီးယား၊ ဖင်လန်၊ အိုက်စလန်၊ လူဇင်ဘတ်၊ ဘရာဇီးနဲ့ မက္ကဆီကိုနိုင်ငံတို့ပဲ ဖြစ်ပါတယ်။