ဗီယက်နမ်ကို နည်းပညာကန့်သတ်ထားသည့်စာရင်းမှ ပယ်ဖျက်ပေးမည်ဟု သမ္မတထရမ့်ပ် ကတိပြု

အမေရိကန်သမ္မတ ဒေါ်နယ်ထရမ့်ပ်သည် ဖေဖော်ဝါရီ ၂၀ ရက်က ဗီယက်နမ်ခေါင်းဆောင် တိုလမ်နှင့် အိမ်ဖြူတော်၌ တွေ့ဆုံစဉ် ဟနွိုင်အား အမေရိကန်၏ အဆင့်မြင့်နည်းပညာများ ရယူခွင့်အပေါ် ကန့်သတ်ထားသည့် နိုင်ငံများစာရင်းမှ ပယ်ဖျက်ပေးရန် လုပ်ဆောင်သွားမည်ဟု ပြောကြားခဲ့ကြောင်း ဗီယက်နမ်အစိုးရ သတင်းဝက်ဘ်ဆိုက်က ထုတ်ပြန်ခဲ့သည်။ ဗီယက်နမ်လေကြောင်းလိုင်းများက အမေရိကန်ဘိုးရင်းကုမ္ပဏီထံမှ ဒေါ်လာ ၃၁ ဘီလျံကျော်တန်ဖိုးရှိ လေယာဉ်များ ဝယ်ယူရန် ကြေညာပြီးနောက် ယခုကဲ့သို့ တွေ့ဆုံခဲ့ခြင်းဖြစ်ပြီး၊ တစ်ချိန်တည်းမှာပင် သမ္မတထရမ့်ပ်က နိုင်ငံအားလုံးမှ သွင်းကုန်များအပေါ် အခွန် ၁၀ ရာခိုင်နှုန်း ကောက်ခံမည့်အစီအစဉ်ကိုလည်း ကြေညာခဲ့ကြောင်း သိရသည်။