ထိုင်းနိုင်ငံက ကိုယ်တိုင်ထုတ်လုပ်တဲ့ ပထမဆုံး လျှပ်စစ်ရထားကို Khon Kaen မြို့မှာ စတင်စမ်းသပ်

ထိုင်းနိုင်ငံမှာ ပထမဆုံး ပြည်တွင်းဖြစ် ဒီဇိုင်းဆွဲ တည်ဆောက်ထားတဲ့ အပေါ့စား လျှပ်စစ်ရထား (Tram) ကို Khon Kaen မြို့က ရာဇမင်္ဂလ နည်းပညာတက္ကသိုလ် (RMUTI) နယ်မြေထဲမှာ စမ်းသပ်မောင်းနှင်နေပြီဖြစ်လို့ အွန်လိုင်းပေါ်မှာ လူစိတ်ဝင်စားမှု များပြားနေပါတယ်။ ထိုင်းသုတေသီတွေ တီထွင်ထားတဲ့ အဲဒီ ရထားပုံစံငယ်ကို လက်ရှိမှာ တက္ကသိုလ်အတွင်း မီတာ ၄၅၀ ရှည်လျားတဲ့ လမ်းကြောင်းပေါ်မှာ နေ့စဉ် စမ်းသပ်ပြေးဆွဲနေပြီး နောက်တစ်နှစ်အတွင်း အပြည့်အဝ ပြေးဆွဲနိုင်ဖို့ မျှော်မှန်းထားပါတယ်။အဲဒီ စီမံကိန်းကို RMUTI Khon Kaen တက္ကသိုလ် အင်ဂျင်နီယာဌာနက ပါမောက္ခ ဒေါက်တာ ပိုင်ဝမ် က ဦးဆောင်ပြီး ၆ နှစ်ကနေ ၇ နှစ်အထိ သုတေသနပြု တီထွင်ခဲ့တာ ဖြစ်ပါတယ်။ တွဲသုံးတွဲပါဝင်တဲ့ အဲဒီရထားဟာ ခရီးသည် ၁၂၀ အထိ တင်ဆောင်နိုင်ပါတယ်။ ဘက်ထရီနဲ့ ခေါင်မိုးပေါ်က လျှပ်စစ်ကြိုးတွေကို ပူးတွဲအသုံးပြုထားတဲ့ စနစ်ဖြစ်ပြီး အနာဂတ်မှာ ဟိုက်ဒရိုဂျင်စွမ်းအင်သုံးအဖြစ် ပြောင်းလဲဖို့လည်း အစီအစဉ် ရှိပါတယ်။ လက်ရှိ စမ်းသပ်ကာလအတွင်းမှာ ကျောင်းသားတွေနဲ့ လေ့လာရေးအဖွဲ့တွေကို စီးနင်းခွင့်ပြုထားသလို ဘူတာရုံတွေ တည်ဆောက်ပြီးရင် ကန်နခွန် ရေကန်ပတ်လည်အထိ လမ်းကြောင်းတွေ တိုးချဲ့ပြေးဆွဲသွားဖို့ စီစဉ်ထားပါတယ်။