ထိုင်းနိုင်ငံက အငှားယာဉ်တွေမှာ QR Code သုံးခု မဖြစ်မနေ ကပ်ထားရတော့မယ်

ထိုင်းနိုင်ငံ ကုန်းလမ်းပို့ဆောင်ရေးဦးစီးဌာနရဲ့ ထုတ်ပြန်ချက်အရ ခရီးသည်တွေအနေနဲ့ ယာဉ်မောင်းအချက်အလက်တွေကို စစ်ဆေးနိုင်ဖို့၊ ယာဉ်စီးခ ခန့်မှန်းတွက်ချက်နိုင်ဖို့နဲ့ တိုင်ကြားမှုတွေ ပြုလုပ်နိုင်ဖို့အတွက် မီတာတက္ကစီတွေအားလုံးမှာ QR code သုံးခု ကပ်ထားရတော့မှာ ဖြစ်ပါတယ်။ အဲဒီ စည်းမျဉ်းသစ်အရ ထိုင်ခုံ ၇ ခုံထက် မပိုတဲ့ အငှားယာဉ်တွေမှာ ပွင့်လင်းမြင်သာမှုရှိစေဖို့နဲ့ ဝန်ဆောင်မှု ပိုမိုကောင်းမွန်လာစေဖို့ အခုလို လုပ်ဆောင်ရတာ ဖြစ်ပါတယ်။ခရမ်းရောင် QR code ကို ယာဉ်မောင်းရဲ့ အရှေ့မှာ ထားရှိရမှာဖြစ်ပြီး ယာဉ်မောင်းအချက်အလက်နဲ့ အလုပ်ချိန်စတင်ကြောင်း ပြသဖို့အတွက် အသုံးပြုရမှာ ဖြစ်ပါတယ်။ အပြာရောင် ဒုတိယ QR code ကိုတော့ ခရီးသည်ထိုင်တဲ့ နောက်ဘက် ဘယ်ဘက်မှန်မှာ ကပ်ထားရမှာဖြစ်ပြီး ခရီးသည်တွေအနေနဲ့ ယာဉ်မောင်းအသေးစိတ်ကို စစ်ဆေးတာ၊ ဝန်ဆောင်မှုကို အကဲဖြတ်တာ၊ တိုင်ကြားတာနဲ့ ယာဉ်စီးခကို ကြိုတင်ခန့်မှန်းတာတွေ လုပ်ဆောင်နိုင်မှာ ဖြစ်ပါတယ်။တတိယမြောက် အနီရောင် QR code ကိုတော့ နောက်ဘက် ဘယ်ဘက်တံခါး အပြင်ဘက်မှာ ကပ်ထားရမှာဖြစ်ပြီး ခရီးသည်တင်ဖို့ ငြင်းဆန်တာလိုမျိုး အရေးပေါ် တိုင်ကြားမှုတွေအတွက် ရည်ရွယ်ပါတယ်။ အဲဒီစနစ်ဟာ ခရီးသည်တွေအတွက် လိုအပ်တဲ့ အချက်အလက်တွေကို ချက်ချင်းသိရှိနိုင်ဖို့နဲ့ လိုအပ်ရင် အမြန်တိုင်ကြားနိုင်မယ့် လမ်းကြောင်းတွေ ပိုမိုရှင်းလင်းသွားစေဖို့ ရည်ရွယ်ထားတာ ဖြစ်ပါတယ်။အဲဒီအစီအစဉ်ကို အဆင့်လိုက် အကောင်အထည်ဖော်သွားမှာဖြစ်ပြီး ဘန်ကောက်မှာ မှတ်ပုံတင်ထားတဲ့ တက္ကစီတွေက ၂၀၂၆ ခုနှစ် ဇန်နဝါရီလ ၁ ရက်နေ့ကစတင်ပြီး လိုက်နာရမှာ ဖြစ်ပါတယ်။