စင်ကာပူ Punggol တိုက်ခန်းတွင် PMA အားသွင်းရာမှ မီးလောင်မှုဖြစ်ပွား

စင်ကာပူနိုင်ငံ Punggol အရပ်မှာရှိတဲ့ လူနေတိုက်ခန်းတစ်ခုမှာ ယမန်နေ့ မနက်ပိုင်းက အားသွင်းထားတဲ့ မသန်စွမ်းသုံး လျှပ်စစ်ဝှီးချဲ (PMA) ကနေတစ်ဆင့် မီးလောင်မှုတစ်ခု ဖြစ်ပွားခဲ့ပါတယ်‌။ အခင်းဖြစ်ပွားရာနေရာကတော့ Block 326C Sumang Walk ရဲ့ ၁၆ ထပ်မြောက်မှာရှိတဲ့ အခန်းတစ်ခုဖြစ်ပြီး မနက် ၇ နာရီဝန်းကျင်မှာ မီးလောင်နေကြောင်း စင်ကာပူမီးသတ်တပ်ဖွဲ့ (SCDF) က သတင်းရရှိခဲ့တာပါ‌။ မီးသတ်သမားတွေဟာ ရေပိုက်အသုံးပြုပြီး မီးကို အမြန်ဆုံး ငြိမ်းသတ်ခဲ့ရသလို၊ မီးခိုးမွှန်သွားတဲ့ လူ (၃) ဦးကိုလည်း အရေးပေါ် ရှေးဦးသူနာပြုစုမှုတွေ ပြုလုပ်ပေးခဲ့ပြီး Singapore General Hospital ကို ပို့ဆောင်ပေးခဲ့ရပါတယ်‌။SCDF ရဲ့ ပဏာမ စုံစမ်းစစ်ဆေးချက်တွေအရ ဒီမီးလောင်မှုဟာ ဧည့်ခန်းထဲမှာ ထားရှိတဲ့ မသန်စွမ်းသုံး လျှပ်စစ်ယာဉ် (PMA) ကနေ စတင်ခဲ့တာ ဖြစ်နိုင်တယ်လို့ သိရပါတယ်‌။ အချက်အလက်တွေအရ စင်ကာပူမှာ ၂၀၂၅ ခုနှစ်အတွင်း လူနေအိမ်တွေမှာ လျှပ်စစ်ကြောင့် မီးလောင်မှုပေါင်း ၃၀၄ ကြိမ်ရှိခဲ့ပြီး အဲဒီအထဲက ၃၄ ကြိမ်ဟာ အခုလို လျှပ်စစ်စကူတာတွေနဲ့ ဝှီးချဲတွေကြောင့် ဖြစ်ပွားခဲ့တာပါ‌။ ဒါကြောင့်လည်း အများပြည်သူအနေနဲ့ လျှပ်စစ်အားသွင်းယာဉ်တွေကို အသုံးပြုတဲ့အခါ အသိအမှတ်ပြုထားတဲ့ မူရင်းဘက်ထရီတွေကိုသာ အသုံးပြုဖို့နဲ့ ဘက်ထရီအားသွင်းတဲ့အခါ အချိန်အကြာကြီး ဒါမှမဟုတ် တစ်ညလုံး အားသွင်းထားတာမျိုး လုံးဝမလုပ်ကြဖို့ SCDF က အလေးအနက် သတိပေးထားပါတယ်‌။