ခရမ်းနှင့် လှိုင်မြို့နယ်ရှိ ဈေးအချို့တွင် ဖော်မလင်ပါသော ပဲသွေးနှင့် ဆိုးဆေးပါသော ငပိများ စစ်ဆေးတွေ့ရှိ

ရန်ကုန်တိုင်းဒေသကြီး၊ ခရမ်းမြို့မဈေးနှင့် လှိုင်ရတနာဈေးတို့တွင် FDA (ရန်ကုန်တောင်ပိုင်းခရိုင်) အဖွဲ့က ရှောင်တခင် စစ်ဆေးခဲ့ရာ စားသုံးရန်မသင့်သည့် ဓာတုပစ္စည်းများ ပါဝင်နေမှုကို တွေ့ရှိခဲ့ရသည်။ ခရမ်းမြို့မဈေးရှိ ပဲသွေး (၁) မျိုးတွင် ရုပ်အလောင်းများ ထိန်းသိမ်းရာ၌ အသုံးပြုသည့် ဖော်မလင် (Formalin) ပါဝင်နေသည်ကို ဖေဖော်ဝါရီ ၃ ရက်တွင် စစ်ဆေးတွေ့ရှိခဲ့ပြီး၊ လှိုင်ရတနာဈေးရှိ စိမ်းစားငပိ (၂) မျိုးတွင်လည်း စက်မှုလုပ်ငန်းသုံး အဝတ်အထည်ဆိုးဆေး (Rhodamine B) များ အသုံးပြုထားသည်ကို ဖေဖော်ဝါရီ ၄ ရက်တွင် ထပ်မံတွေ့ရှိခဲ့ခြင်းဖြစ်သည်။ တာဝန်ရှိသူများက အဆိုပါ ပဲသွေးနှင့် ငပိများကို သိမ်းဆည်းဖျက်ဆီးခဲ့ပြီး ရောင်းချသူများကိုလည်း နောက်နောင် မပြုလုပ်ရန် ဈေးတာဝန်ခံရုံးများတွင် ခံဝန်ကတိ ရေးထိုးခိုင်းခဲ့သည်။ ဤဓာတုပစ္စည်းများသည် ရေရှည်စားသုံးပါက အသည်း၊ ကျောက်ကပ် ပျက်စီးခြင်းနှင့် ကင်ဆာရောဂါများ ဖြစ်ပွားစေနိုင်သဖြင့် စားသုံးသူများအနေဖြင့် အရောင်နီလွန်းသော ငပိများနှင့် ပုံမှန်မဟုတ်သော ဓာတုနံ့ရသည့် အစားအစာများကို အထူးသတိပြု ရှောင်ကြဉ်ကြရန် နှိုးဆော်ထားပါသည်။