မူဆယ်မြို့တွင် ဆိုင်ကယ်ရိုက်လုမှုနှင့် ကားခိုးမှုများဖြစ်ပွား၊ ဒေသခံများ လုံခြုံရေးစိုးရိမ်နေ

ရှမ်းပြည်နယ်မြောက်ပိုင်း၊ မူဆယ်မြို့တွင် ဇန်နဝါရီလ ၁၂ ရက်နှင့် ၁၃ ရက်တို့၌ ကားခိုးမှုနှင့် ဆိုင်ကယ်ရိုက်လုမှုများ ဆက်တိုက်ဖြစ်ပွားခဲ့သည်။ ဇန်နဝါရီ ၁၃ ရက် နံနက် ၅ နာရီခန့်က ဟိုနားရပ်ကွက်အတွင်း တရုတ်ဘက်သို့သွားရန် တန်းစီမည့် ဆိုင်ကယ်သမားတစ်ဦးကို လူ ၂ ဦးက ရိုက်နှက်ကာ ဆိုင်ကယ်လုယူသွားသဖြင့် ဆိုင်ကယ်ပိုင်ရှင် ခေါင်းတွင်ဒဏ်ရာရရှိခဲ့သည်။ ထို့အပြင် ဇန်နဝါရီ ၁၂ ရက် ညနေပိုင်းကလည်း အမှတ် (၁) လမ်းမကြီးပေါ်တွင် ရပ်ထားသည့် Crown ကားတစ်စီး ထပ်မံခိုးယူခံခဲ့ရသည်။ မူဆယ်မြို့တွင် ဌာနဆိုင်ရာများရှိနေသော်လည်း တရားဥပဒေစိုးမိုးမှု အားနည်းနေသဖြင့် ခိုး၊ ဆိုး၊ လုယက်မှုများ မကြာခဏဖြစ်ပွားနေကာ ဒေသခံများမှာ လုံခြုံရေးအတွက် စိုးရိမ်မကင်းဖြစ်နေကြကြောင်း သိရှိရပါသည်။