၂၀၂၅ ခုနှစ်အတွင်း မြန်မာတစ်နိုင်ငံလုံး၌ ကျပ် ၁၇၆၁ ဘီလီယံကျော်တန်ဖိုးရှိ မူးယစ်ဆေးဝါးနှင့် လက်နက်ခဲယမ်းများ ဖမ်းဆီးရမိ

မြန်မာနိုင်ငံတွင် ၂၀၂၅ ခုနှစ်အတွင်း မူးယစ်ဆေးဝါးတားဆီးနှိမ်နင်းရေး အရှိန်အဟုန်မြှင့် ဆောင်ရွက်ခဲ့ရာ တစ်နှစ်တာအတွင်း အမှုပေါင်း ၅,၃၇၀ မှုမှ တရားခံ ၇,၅၆၂ ဦးကို ငွေကျပ် ၁၇၆၁ ဘီလီယံကျော်တန်ဖိုးရှိ မူးယစ်ဆေးဝါးများနှင့်အတူ ဖမ်းဆီးရမိခဲ့ကြောင်း CCDAC MYANMAR က ထုတ်ပြန်လိုက်သည်။ ဖမ်းဆီးရမိမှုများတွင် စိတ်ကြွဆေးပြား ၃၇၇ သန်းကျော်၊ အိုက်စ် (Ice) ၃၇ တန်ကျော်နှင့် ကက်တမင်း ၁၅ တန်ကျော်တို့ အဓိကပါဝင်ပြီး၊ ပစ္စတိုသေနတ် ၄၀ လက်အပါအဝင် လက်နက်ခဲယမ်းများ၊ ဒီတိုနေတာ ၁ သိန်း ၈ သောင်းကျော်တို့ကိုပါ သိမ်းဆည်းရမိခဲ့သည်။ ထို့ပြင် ရှမ်းပြည်နယ်အတွင်းရှိ ဘိန်းချက်စခန်းများနှင့် ဆေးပြားရိုက်စက်များကို ဖော်ထုတ်နိုင်ခဲ့သည့်အပြင် ၂၀၂၅-၂၀၂၆ ဘိန်းစိုက်ရာသီအတွင်း ရှမ်းပြည်နယ်တောင်ပိုင်းနှင့် အရှေ့ပိုင်းတို့၌ ဘိန်းစိုက်ခင်း ဧက ၅,၀၀၀ ကျော်ကိုလည်း ဖျက်ဆီးနိုင်ခဲ့ကြောင်း သိရှိရပါသည်။