ဘန်ကောက်မှာ အလုပ်လုပ်ဖို့ ပွဲစားခ ဘတ် ၁၅၀၀၀ ကနေ ၂၀၀၀၀ အထိပေးပြီးလာတဲ့ မြန်မာနိုင်ငံသား ၁၃ ဦး ထိုင်းရဲနဲ့တွေ့ပြီး ဖမ်းဆီးခံရ

ထိုင်းနိုင်ငံ၊ ဘန်ကောက်မြို့တွင် အလုပ်လုပ်ကိုင်ရန်အတွက် တစ်ဦးလျှင် ပွဲစားခ ထိုင်းဘတ် ၁၅,၀၀၀ မှ ၂၀,၀၀၀ အထိ ပေးဆောင်၍ လာရောက်သည့် မြန်မာနိုင်ငံသား ၁၃ ဦးကို ဇန်နဝါရီလ ၉ ရက်နေ့ မွန်းလွဲ ၂ နာရီအချိန်ခန့်က အယုဒ္ဓယမြို့အနီးရှိ အမြန်လမ်းပိုင်းတွင် ထိုင်းရဲတပ်ဖွဲ့က မသင်္ကာဖွယ် မှန်လုံကားတစ်စီးကို တားဆီးစစ်ဆေးရာမှတစ်ဆင့် ဖမ်းဆီးရမိခဲ့ကြောင်း သိရသည်။ အဆိုပါ မြန်မာနိုင်ငံသားများနှင့်အတူ လိုက်ပါလာသည့် ထိုင်းနိုင်ငံသား ယာဉ်မောင်းကိုလည်း အယုဒ္ဓယရဲစခန်းတွင် ထိန်းသိမ်းထားရှိပြီး၊ ထိုနေ့၌ပင် မဲဆောက်မြို့၌လည်း တရားမဝင် နေထိုင်သည့် မြန်မာနိုင်ငံသား ၁၉ ဦးကို ထိုင်းလူဝင်မှုကြီးကြပ်ရေးဌာနက ဖမ်းဆီးခဲ့ကြောင်း သိရှိရပါသည်။