အမေရိကန်ပြည်ထောင်စုရဲ့မင်နီယာပိုလစ်မှာ အမေရိကန်လူဝင်မှုကြီးကြပ်ရေး အေးဂျင့်တွေပစ်ခတ်မှု အမျိုးသမီးတစ်ယောက်သေဆုံး

အမေရိကန်ပြည်ထောင်စု မင်နီယာပိုလစ်မြို့မှာ လူဝင်မှုကြီးကြပ်ရေး အေးဂျင့်တယောက်ရဲ့ ပစ်ခတ်မှုကြောင့် အသက် ၃၇ နှစ်အရွယ် အမျိုးသမီးတစ်ယောက် သေဆုံးသွားပါတယ်။ ဒီဖြစ်စဉ်မှာ မိမိကိုယ်ကိုယ် ကာကွယ်ဖို့အတွက် ပစ်ခတ်ခဲ့တယ်ဆိုပြီး ထရန့်အစိုးရရဲ့ ပြောဆိုချက်ကို မင်နီယာပိုလစ်မြို့တော်ဝန် ဂျက်ကော့ဖရေးက ပြတ်ပြတ်သားသား ငြင်းဆိုခဲ့ပြီး "သူတို့က ဒါကို မိမိကိုယ်ကိုယ် ကာကွယ်တဲ့လုပ်ရပ်အဖြစ် ပြောင်းလဲဖို့ ကြိုးစားနေကြပြီ" လို့သတင်းစာရှင်းလင်းပွဲမှာ ပြောပါတယ်။ လူဝင်မှုကြီးကြပ်ရေး အေးဂျင့်တွေ မြို့ကနေ ထွက်သွားဖို့ကိုလည်း သူက တောင်းဆိုပါတယ်။ဖရေးက မြို့တော်မှာ ရှုပ်ထွေးမှုများ ဖြစ်ပေါ်စေခဲ့တယ်လို့ ဖက်ဒရယ်လူဝင်မှုကြီးကြပ်ရေးအေးဂျင့်တွေကို အပြစ်တင်ခဲ့ပေမယ့်လည်း ဒေသခံတွေအနေနဲ့ စိတ်အေးအေးထားဖို့တိုက်တွန်းထားပါတယ်။ ပစ်ခတ်မှုကြောင့် အခင်းဖြစ်ပွားရာနေရာအနီးရှိ လမ်းတွေပေါ်ကို ဆန္ဒပြသူရာပေါင်းများစွာ ရောက်ရှိလာခဲ့ပြီး လက်နက်ကိုင် လုံခြုံရေးတွေနဲ့ ထိပ်တိုက်တွေ့ခဲ့ပါတယ်။ အမိမြေလုံခြုံရေးဌာနကတော့ အေးဂျင့်တွေဟာ ပြည်တွင်းအကြမ်းဖက်မှုတစ်ခုကို တားဆီးနိုင်ခဲ့ပြီး အသက်များစွာကို ကယ်တင်နိုင်ခဲ့တယ်လို့ ကြေညာချက်မှာ အခိုင်အမာဆိုပါတယ်။ ကျယ်ကျယ်ပြန့်ပြန့် မျှဝေထားတဲ့ ဗီဒီယိုတခုမှာတော့ ဆန္ဒပြနေသူတွေရှိတဲ့ နေရာအနီးမှာ အညိုရောင် Honda SUV ကားတစီးဟာ လမ်းကို တစိတ်တပိုင်း ပိတ်ဆို့နေတာကို ပြသထားပြီး ယာဉ်မောင်းဟာ အခြားကားတစီး ရှေ့မှာရပ်တန့်နေတာကြောင့် မောင်းနှင်နိုင်စေဖို့ ရှေ့ကို အနည်းငယ် ရှေ့တိုးလိုက်ပါတယ်။ ယာဉ်မောင်းဟာ ပြတင်းပေါက်မှန်ကို ချထားပြီးနောက် ချဉ်းကပ်လာတဲ့ ပစ်ကပ်ကားတစီးကိုလည်း ရှေ့သို့သွားဖို့ လက်ဟန်ပြနေပုံရပါတယ်။ အဲဒီနောက် ပစ်ကပ်ကားပေါ်ကနေ ရဲအရာရှိနှစ်ယောက် ထွက်လာပြီး ကားဆီကို ခြေလျင်ချဉ်းကပ်သွားပါတယ်။