မြဝတီမြို့တွင် တစ်ဦးတည်းနေထိုင်သည့် ကုန်ခြောက်သည်အမျိုးသမီးတစ်ဦး ခြေလက်ကြိုးတုတ် ရိုက်သတ်ခံရ

ကရင်ပြည်နယ်၊ မြဝတီမြို့၊ အမှတ် (၃) ရပ်ကွက်၊ ဝေဘာဂီလမ်းရှိ နေအိမ်တွင် တစ်ဦးတည်း နေထိုင်သည့် အသက် ၄၃ နှစ်အရွယ် ဒေါ်မေဆန်း ဆိုသူမှာ ရက်စက်စွာ သတ်ဖြတ်ခံခဲ့ရကြောင်း ဇန်နဝါရီလ ၆ ရက်နေ့တွင် သိရှိရသည်။ သေဆုံးသူမှာ မြဝတီ ဘုရင့်နောင်ဈေးကြီးတွင် ကုန်ခြောက်ရောင်းချသူဖြစ်ပြီး ဇန်နဝါရီ ၃ ရက် နံနက်ပိုင်း ဈေးသွားရန်အထွက်၌ လုပ်ကြံခံရခြင်းဖြစ်နိုင်ကြောင်း ဆွေမျိုးများက ခန့်မှန်းထားကြသည်။ ၎င်းအား နေအိမ်အတွင်း မျက်နှာကို အဝတ်စည်း၊ ခြေလက်များကို ကြိုးဖြင့် နောက်ပြန်တုတ်နှောင်ကာ ဦးခေါင်းအား ရိုက်နှက်ထားသည့် ဒဏ်ရာများဖြင့် သေဆုံးနေသည်ကို ဇန်နဝါရီ ၅ ရက်တွင်မှ တွေ့ရှိခဲ့ခြင်းဖြစ်သည်။ ပြစ်မှုကျူးလွန်သူများသည် သေဆုံးသူ၏ လက်ကိုင်အိတ်အတွင်းရှိ ရွှေနှင့် ငွေကြေးအချို့ကို ယူဆောင်သွားသော်လည်း ဝတ်ဆင်ထားသည့် လက်စွတ်နှင့် ဆွဲကြိုးတို့ကိုမူ ချန်ထားခဲ့ကြောင်း သိရသည်။ လက်ရှိတွင် မြဝတီမြို့နယ်ရဲစခန်းမှ တရားခံများကို အမြန်ဆုံးဖမ်းဆီးရမိနိုင်ရေးအတွက် အပူတပြင်း စုံစမ်းဖော်ထုတ်လျက်ရှိကြောင်း သိရှိရပါသည်။