စင်ကာပူတွင် သားသမီးများကို နှစ်ရှည်လများ ရက်စက်စွာ ညှင်းပန်းနှိပ်စက်ခဲ့သည့် ဖခင်ဖြစ်သူကို ထောင်ဒဏ် ၁၅ လ ချမှတ်

စင်ကာပူနိုင်ငံသား အသက် ၄၇ နှစ်အရွယ် ဖခင်တစ်ဦးသည် အထူးပြုစုစောင့်ရှောက်မှုလိုအပ်သည့် သားအကြီးနှင့် သားအငယ်တို့အပေါ် နှစ်ရှည်လများ ရိုက်နှက်ခြင်း၊ ဆိတ်ဆွဲခြင်း၊ ဒူးထောက်ခိုင်းခြင်းနှင့် ထမင်းငတ်ထားခြင်းစသည့် ရက်စက်သော ညှင်းပန်းနှိပ်စက်မှုများ ကျူးလွန်ခဲ့သည့်အတွက် ဇန်နဝါရီ ၂ ရက်တွင် တရားရုံးက ထောင်ဒဏ် ၁၅ လ အပြီးသတ် ပြစ်ဒဏ်ချမှတ်လိုက်သည်။ ၎င်း၏ လုပ်ရပ်များကို ကျူရှင်ဆရာမက စတင်သတိပြုမိခဲ့ပြီးနောက် ဇနီးဖြစ်သူက ကလေးများကိုခေါ်ကာ အိမ်မှဆင်းသွားခဲ့ရကြောင်း၊ ၂၀၂၄ ခုနှစ်အတွင်း ဖခင်ဖြစ်သူကိုယ်တိုင် ရဲစခန်းသို့ သွားရောက်ဝန်ခံခဲ့ပြီးနောက် စုံစမ်းစစ်ဆေးမှုများပြုလုပ်ကာ ကလေးသူငယ်နှင့် လူငယ်များဆိုင်ရာ အက်ဥပဒေဖြင့် အမှုဖွင့် အရေးယူခံခဲ့ရခြင်းဖြစ်သည်။ တရားသူကြီးက ယင်းလုပ်ရပ်များသည် လက်ခံနိုင်ဖွယ်မရှိသည့် အင်အားအလွန်အကျွံသုံး ဆုံးမမှုများဖြစ်ကြောင်း သတ်မှတ်ကာ ယခုကဲ့သို့ ပြစ်ဒဏ်ချမှတ်ခဲ့ခြင်းဖြစ်ကြောင်း သိရှိရပါသည်။