အိမ်ရှေ့တံမြတ်စည်းလှဲနေသော အမျိုးသမီးတစ်ဦးကို ဓားနှင့်လှီး၍ ဆွဲကြိုးလုယက်မှု ရန်ကုန်တိုင်းဒေသကြီး၊ သန်လျင်မြို့နယ်၊ အောင်မင်္ဂလာရပ်ကွက်တွင် ယနေ့နံနက်က ဖြစ်ပွားခဲ့ကြောင်း ဒေသခံလူမှုကူညီရေးအသင်းများမှ သိရ သည်။ယနေ့ ဒီဇင်ဘာ ၃၁ ရက် နံနက် ၄ နာရီအချိန်ခန့်ကဖြစ်ပွားခဲ့ပြီး အခင်းဖြစ်ပွားရာနေရာသို့ ဒေသခံလူမှုကူညီရေးအသင်းများ ရောက်ရှိချိန်တွင် ဆွဲကြိုးလုယက်ခံရသည့် အမျိုးသမီးတစ်ဦးမှာ နှာခေါင်းအောက်၊ နှုတ်ခမ်းအောက်တွင် ဓားဖြင့် လှီးဖြတ်ထားသည့် ဒဏ်ရာများရရှိခဲ့ခြင်းဖြစ်သည်။အဆိုပါ ဓားဒဏ်ရာများရရှိခဲ့သည့် အမျိုးသမီးတစ်ဦးကို လူမှုကူညီရေးအသင်းယာဉ်ဖြင့် သန်လျင်ဆေးရုံမှတဆင့် ရန်ကုန်ဆေးရုံကြီးသို့ အရေးပေါ် ကူညီပို့ဆောင်ပေးခဲ့ကြောင်း၊ တာဝန်ရှိသူများမှလည်း ဓားဖြင့် ထိုးသွားသည့်တရားခံကို ဖမ်းဆီးရမိရေးအတွက် စုံစမ်းစစ်ဆေးမှုများ ပြုလုပ်လျက်ရှိကြောင်း သိရသည်။
