ထိုင်းတွင် နေ့စားအိမ်အကူက ကလေးနို့ဗူးထဲ ပိုးသတ်ဆေးထည့်သည့်ဖြစ်ရပ်ကြောင့် မိဘများ ထိတ်လန့်နေ

ထိုင်းနိုင်ငံတွင် Facebook မှတစ်ဆင့် ငှားရမ်းခဲ့သည့် နေ့စားအိမ်အကူ အမျိုးသမီးတစ်ဦးက ကလေးနို့ဗူးထဲသို့ Dettol ပိုးသတ်ဆေးရည် တမင်လောင်းထည့်ခဲ့သည့် ဖြစ်ရပ်တစ်ခုကြောင့် မိဘများကြား အထူးစိုးရိမ်ထိတ်လန့်နေကြသည်။ ကလေး၏အဘွားက နို့ဗူးတိုက်စဉ် ဆေးနံ့ပြင်းပြင်းရသဖြင့် ချက်ချင်းရပ်တန့်နိုင်ခဲ့သောကြောင့် ကလေးငယ်မှာ ဘေးအန္တရာယ်ကင်းခဲ့သော်လည်း ဆေးရုံတွင် ၂၄ နာရီ စောင့်ကြည့်ခဲ့ရသည်။ CCTV မှတ်တမ်းများအရ အဆိုပါအိမ်အကူသည် နို့ဗူးထဲသို့ ဆေးထည့်ခဲ့သည့်အပြင် အိမ်တွင်းနေရာအနှံ့ကို ဓာတ်ပုံရိုက်ကူးနေသည်ကိုလည်း တွေ့ရှိခဲ့ရပြီး၊ ၎င်းသည် အိမ်ရှင်များကို အာရုံလွှဲကာ ပစ္စည်းခိုးယူရန် ကြံစည်လေ့ရှိသူဖြစ်ကြောင်း လူမှုကွန်ရက်တွင် သတင်းများထွက်ပေါ်နေသည်။ လက်ရှိတွင် မိခင်ဖြစ်သူက ရဲစခန်း၌ အမှုဖွင့်ထားပြီး အခြားမိဘများအနေဖြင့် နေ့စားအိမ်အကူငှားရမ်းပါက အထူးဂရုစိုက်ရန်နှင့် CCTV တပ်ဆင်ထားရန် သတိပေးထားသည်။