ဗီယက်နမ်-တရုတ် ချိတ်ဆက်မည့် ဒေါ်လာ ၇ ဒသမ ၇ ဘီလီယံတန် ရထားလမ်းသစ်စီမံကိန်း စတင်

ဗီယက်နမ်နိုင်ငံနှင့် တရုတ်နိုင်ငံ ယူနန်ပြည်နယ်တို့ကို ချိတ်ဆက်ပေးမည့် အမြန်ရထားလမ်းသစ် စီမံကိန်း အုတ်မြစ်ချပွဲကို ဒီဇင်ဘာ ၁၉ ရက်က နယ်စပ်မြို့ဖြစ်သော လောင်ကိုင်တွင် ကျင်းပခဲ့သည်။ ဗီယက်နမ်ဘက်ခြမ်း၌ ကီလိုမီတာ ၄၀၀ ရှည်လျားမည့် ဤရထားလမ်းသည် ဟိုင်ဖုန်းဆိပ်ကမ်း၊ ဟနွိုင်းမြို့တော်နှင့် လောင်ကိုင်တို့ကို ဆက်သွယ်ပေးမည်ဖြစ်ပြီး ၂၀၃၀ ပြည့်နှစ်တွင် အပြီးသတ်ရန် လျာထားကာ နှစ်စဉ် ကုန်စည်တန်ချိန် ၂၁ သန်းနှင့် ခရီးသည် ၁၄ သန်း သယ်ယူပို့ဆောင်နိုင်မည်ဖြစ်သည်။ အဆိုပါ စီမံကိန်းသည် နှစ်နိုင်ငံကုန်သွယ်မှုကို မြှင့်တင်ပေးနိုင်မည်ဖြစ်သော်လည်း၊ တရုတ်နိုင်ငံအနေဖြင့် ဤလမ်းကြောင်းကို အသုံးပြု၍ အမေရိကန်၏ အခွန်စည်းကြပ်မှုများမှ ရှောင်လွှဲကာ ကုန်ပစ္စည်းများ တင်ပို့မည်ကို အမေရိကန်ဘက်မှ စိုးရိမ်လျက်ရှိကြောင်း သိရသည်။