ထိုင်းနိုင်ငံ၊ တာ့က်ခရိုင်၊ မဲ့လမတ်မြို့နယ်ရှိ ကြံခင်းတစ်ခုအတွင်း မြန်မာနိုင်ငံဘက်မှ လွှတ်တင်လိုက်သည့် ကိုယ်တိုင်ပြုလုပ်ထားသော ဒရုန်းတစ်စင်း ဒီဇင်ဘာ ၁၉ ရက် ညနေပိုင်းက ပျက်ကျခဲ့ကြောင်း ထိုင်းအာဏာပိုင်များက သတင်းထုတ်ပြန်ခဲ့သည်။ အဆိုပါဒရုန်းတွင် တရုတ်နိုင်ငံထုတ် စက်ပစ္စည်းအစိတ်အပိုင်းများ ပါဝင်ပြီး ပေါက်ကွဲစေတတ်သည့် ဗုံးသီးတစ်လုံးလည်း တပ်ဆင်ထားသည်ကို တွေ့ရှိရသဖြင့် ထိုင်းစစ်တပ်က ဗုံးသီးကို ဖျက်ဆီးကာ ဒရုန်းကိုယ်ထည်ကို နည်းပညာစစ်ဆေးရန် သိမ်းဆည်းထားသည်။ ထိုင်းအာဏာပိုင်များအနေဖြင့် ယင်းဒရုန်းမှာ မြန်မာနိုင်ငံဘက်ရှိ လက်နက်ကိုင်အဖွဲ့အစည်းတစ်ခုခုမှ ပိုင်ဆိုင်သည်ဟု ယူဆထားပြီး နယ်စပ်လုံခြုံရေးအတွက် ဆက်လက်စစ်ဆေးမှုများ ပြုလုပ်နေကြောင်း သိရသည်။
