ဒီဇင်ဘာလ ၁၈ ရက်နေ့ နံနက်ပိုင်းက မွန်ပြည်နယ်၊ မော်လမြိုင်မြို့ အထွေထွေရောဂါကု ပြည်သူ့ဆေးရုံကြီးတွင် နှုတ်ခမ်းကွဲ၊ အာခေါင်ကွဲ အခမဲ့ ခွဲစိတ်ကုသမှု စတင် ခဲ့ကြောင်းသိရသည်။အခမ်းအနားတွင် မွန်ပြည်နယ်ဝန်ကြီးချုပ် ဦးအောင်ကြည်သိန်းက မွန်ပြည်နယ်အတွင်းရှိ မြို့နယ်များသာမက ကရင်ပြည်နယ်ရှိ နှုတ်ခမ်းကွဲ၊ အာခေါင်ကွဲ ဝေဒနာရှင်ပေါင်း ၆ဝ ဦးခန့်ကို အခမဲ့ခွဲစိတ်ပေးမည်ဟု သိရှိရသည့်အတွက် အလွန်ပင်ဝမ်းမြောက်မိပါကြောင်း ပြောကြားခဲ့သည်။နှုတ်ခမ်းကွဲ၊ အာခေါင်ကွဲ လူနာများ ခွဲစိတ်ကုသခြင်းအားဖြင့် ကလေးများ စကားကို ပီသအောင်ပြောနိုင်ခြင်း၊ အစာစား ရေသောက်ရင်လည်း ပုံမှန် စားသောက်လို့ရခြင်း၊ ပတ်ဝန်းကျင်နှင့် သဟဇာတဖြစ်အောင်နှင့် လူတန်းစေ့ နေနိုင်ခြင်းစသည့် အကျိုးတရားများစွာ ရရှိခံစားရမည်ဖြစ်သည့်အတွက် အခမဲ့ခွဲစိတ်ကုသမှု၌ ပါဝင်ဆောင်ရွက်ပေးကြသူများကို အထူးပင်ကျေးဇူးတင်ရှိပါကြောင်း ၎င်းက ပြောဆိုခဲ့သည်။
