ရန်ကုန်အာကာသပြတိုက်သို့ လာရောက်လေ့လာသူ များပြားသဖြင့် ရုံးပိတ်ရက်များတွင် ဖွင့်လှစ်ချိန် တိုးမြှင့်သတ်မှတ်

ရန်ကုန်မြို့၊ ပြည်သူ့ရင်ပြင်အတွင်းရှိ အာကာသပြတိုက်သို့ လာရောက်လေ့လာသူ များပြားလာခြင်းကြောင့် ဒီဇင်ဘာလ ၁၃ ရက်မှစတင်၍ စနေ၊ တနင်္ဂနွေနှင့် အစိုးရရုံးပိတ်ရက်များတွင် နံနက် ၈ နာရီမှ ညနေ ၅ နာရီအထိ ဖွင့်လှစ်ချိန်ကို တိုးမြှင့်လိုက်ကြောင်း သိရသည်။ ယခင် နက္ခတ်တာရာပြခန်းကို အဆင့်မြှင့်တင်ထားသည့် အဆိုပါပြတိုက်တွင် နက်ရှိုင်းအာကာသလေ့လာရေးပြခန်း၊ VR Simulation နှင့် နိုင်ငံတကာသုံး ဒုံးပျံ/ဂြိုလ်တုပုံစံတူများအပြင် Digital Planetarium စနစ်ဖြင့် နေ့စဉ်မတူညီသော အာကာသဆိုင်ရာ အစီအစဉ်များကို ပြသပေးလျက်ရှိသည်။ ဝင်ကြေးနှုန်းထားများအဖြစ် ကျောင်းသား/သံဃာ ၅၀၀ ကျပ်၊ ၁၂ နှစ်အောက် ၁,၀၀၀ ကျပ်၊ ၁၂ နှစ်အထက် ၁,၅၀၀ ကျပ်နှင့် နိုင်ငံခြားသား ၅,၀၀၀ ကျပ် အသီးသီး သတ်မှတ်ထားကြောင်း ပြတိုက်၏ ထုတ်ပြန်ချက်အရ သိရသည်။