တရုတ်နိုင်ငံမှ မြန်မာနိုင်ငံရှိ ငလျင်ဒဏ်သင့် မိသားစုများအတွက် နေအိမ်ပြန်လည်တည်ဆောက်ရေးကို ပံ့ပိုးကူညီမည်

မြန်မာနိုင်ငံဆိုင်ရာ တရုတ်သံရုံး၏ ထုတ်ပြန်ချက်အရ တရုတ်နိုင်ငံသည် မြန်မာနိုင်ငံရှိ သဘာဝဘေးဒဏ်သင့် မိသားစုများအတွက် နေအိမ်များ ပြန်လည်ထူထောင် တည်ဆောက်ရာ၌ ဆက်လက် ပံ့ပိုးကူညီသွားမည်ဖြစ်ပြီး၊ လူသားချင်းစာနာထောက်ထားမှုဆိုင်ရာ အကူအညီများကိုလည်း ဆက်လက် ပေးအပ်သွားမည်ဟု သိရသည်။ ပြီးခဲ့သည့် မတ်လ ၂၈ ရက် ငလျင်လှုပ်ခတ်စဉ်ကလည်း တရုတ်နိုင်ငံက WFP ထံ အမေရိကန်ဒေါ်လာ ၄ သန်း ထောက်ပံ့ခဲ့ရာ ဆန် ၅,၁၂၆ တန် ဝယ်ယူနိုင်ခဲ့ပြီး ငလျင်ဘေးသင့်ဒေသမှ ပြည်သူ ၃၇၉,၀၀၀ ခန့်ကို ဖြန့်ဝေပေးခဲ့သည်။ လက်ရှိတွင် ဆန်အများစုကို ဖြန့်ဝေပေးပြီးဖြစ်ကာ ကျန်ရှိသည့်ဆန်များကို လာမည့် ဇန်နဝါရီလတွင် ဆက်လက် ဖြန့်ဝေပေးအပ်သွားမည်ဖြစ်ကြောင်း သိရှိရသည်။