ချင်းလူမျိုး မြန်မာဖိုက်တာ UFC Flyweight ချန်ပီယံ Joshua "The Fearless" Van ရဲ့ ထူးခြားသော အောင်မြင်မှုကို ဂုဏ်ပြုတဲ့ အခမ်းအနားကြီးတစ်ခုကို လာမယ့် ဒီဇင်ဘာ ၁၉ ရက်နေ့မှာ အမေရိကန်ပြည်ထောင်စု၊ အင်ဒီယားနားပလစ်မြို့မှာ ကျင်းပသွားမယ်လို့ သိရပါတယ်။Van ရဲ့ ပြတ်သားသော ကြိုးစားအားထုတ်မှုနဲ့ မွန်မြတ်တဲ့ စိတ်ဓာတ်များကို အလေးအနက် အသိအမှတ်ပြု ချီးကျူးဖို့ ရည်ရွယ်ပြီး ၎င်းရဲ့ အောင်ပွဲဟာ ချင်းအသိုင်းအဝိုင်းရဲ့ စည်းလုံးညီညွတ်မှုနဲ့ စိတ်ဓာတ်ခွန်အားအတွက် တွန်းအားဖြစ်စေကြောင်း ဂုဏ်ပြုပွဲကော်မတီက ထုတ်ဖော် ပြောကြားခဲ့ပါတယ်။ဂုဏ်ပြုပွဲကို အင်ဒီယားနားပလစ်မြို့ရှိ Chin Evangelical Baptist Church Life Center မှာ ခမ်းနားစွာကျင်းပရန် စီစဉ်ထားပါတယ်။ပွဲစီစဉ်မှုမှာ Chin Baptist Churches of USA (CBCBUSA), Chin Community of Indiana (CCI) နဲ့ Chin Youth Organization of North America (CYONA) အပါအဝင် ချင်းလူမျိုး အဖွဲ့အစည်းများစွာက ပူးပေါင်း ပါဝင်ပါတယ်။အခမ်းအနားသို့ တက်ရောက် ဂုဏ်ပြုနိုင်ဖို့ ဘုရားရှိခိုးကျောင်း သင်းအုပ်ဆရာများ၊ ခေါင်းဆောင်များနဲ့ အသင်းသားများကို တရားဝင် ဖိတ်ကြားထားကြောင်းလည်း သိရပါတယ်။အသက် (၂၄) နှစ်အရွယ်ရှိ Joshua Van ဟာ မကြာသေးမီက UFC ပြိုင်ပွဲကြီးတွင် ၎င်းရဲ့ပြိုင်ဘက်ကို အလဲထိုး အနိုင်ရရှိခဲ့ပြီး ဖလိုင်းဝိတ်တန်း ချန်ပီယံခါးပတ်ကို ဆွတ်ခူးခဲ့ခြင်း ဖြစ်ပါတယ်။သူဟာ ကမ္ဘာ့အဆင့် အမြင့်ဆုံး တိုက်ခိုက်ရေးပြိုင်ပွဲတွေမှာ ချန်ပီယံဆုကို ပိုင်ဆိုင်တဲ့ ပထမဆုံး မြန်မာနိုင်ငံသား ဖြစ်လာခဲ့ရာ တစ်နိုင်ငံလုံးအတွက် ဂုဏ်ယူဝမ်းမြောက်စရာ သမိုင်းသစ်ကို တည်ထောင်ပေးခဲ့သူလည်း ဖြစ်ပါတယ်။Van ရဲ့ ပြင်းထန်သော စွမ်းဆောင်ရည်၊ သံမဏိလို ခံနိုင်ရည်နှင့် "The Fearless" ဟူသည့် နာမည်နဲ့ လိုက်ဖက်သော ရဲရင့်တဲ့ စိတ်ဓာတ်တို့က ကမ္ဘာ့ပရိသတ်များကို အံ့အားသင့်စေ ခဲ့ပါတယ်။
