တရုတ်သမ္မတရှီကျင်ပင်းသည် ဒီဇင်ဘာ ၅ရက်တွင် ပြင်သစ်သမ္မတ အီမန်နူရယ်မက်ခရွန်နှင့်အတူ တရုတ်နိုင်ငံအနောက်တောင်ပိုင်း စီချွမ်ပြည်နယ် ချန်ဒူးမြို့တော်သို့ သွားရောက်လည်ပတ်ခဲ့ကြောင်း သိရ သည်။အဆိုပါခရီးစဉ်သည် ပြင်သစ်သမ္မတ အီမန်နူရယ်မက်ခရွန်အတွက် အထူးစီစဉ်ထားသည့်ရှားရှားပါးပါးခရီးစဉ်မျိုးပင်ဖြစ်နိုင်ကြောင်း နိုင်ငံတကာ မီဒီယာများက သုံးသပ်ထားသည်။ပြင်သစ်သမ္မတမက်ခရွန်၏ ချန်ဒူးမြို့တော်ခရီးစဉ်တွင် တရုတ်သမ္မတကိုယ်တိုင် အတူလိုက်ပါခဲ့ခြင်းသည် ဥရောပသမဂ္ဂနှင့် အဆက်အဆံပြုလုပ်ရာ၌ တရုတ်အစိုးရအနေဖြင့် ပြင်သစ်နိုင်ငံအပေါ် အဓိကအားပြုထားပုံကို ပြသလျက်ရှိသည်။ပြင်သစ်နိုင်ငံသည်ဥရောပ၏စီးပွားရေးအင်အားဒုတိယအကြီးဆုံးနိုင်ငံဖြစ်သည်။ပြင်သစ်သမ္မတမက်ခရွန် နှင့် တရုတ်သမ္မတရှီကျင်ပင်းတို့သည် ဒီဇင်ဘာ ၄ ရက်တွင် ပေကျင်းမြို့တော်၌ တွေ့ဆုံဆွေးနွေးခဲ့ကြပြီး နှစ်နိုင်ငံပူးပေါင်းဆောင်ရွက်ချက် ၁၂ ခုကို လက်မှတ်ရေးထိုးခဲ့သည်။ပြင်သစ်သမ္မတ မက်ခရွန်သည် သုံးရက်ကြာတရုတ်နိုင်ငံခရီးစဉ်ကို ဒီဇင်ဘာ ၃ ရက်တွင် စတင်ခဲ့ပြီး ယင်းခရီးစဉ်သည် ၎င်း၏ စတုတ္ထမြောက်တရားဝင် တရုတ်နိုင်ငံခရီးစဉ်ဖြစ်သည်။အဆိုပါ ခရီးစဉ်တွင် သမ္မတမက်ခရွန်နှင့်အတူ ပြင်သစ်နိုင်ငံ၏ အကြီးဆုံးကုမ္ပဏီကြီးများမှအကြီးအကဲများ လိုက်ပါသွားကြောင်း သိရသည်။သို့ရာတွင် ယင်းခရီးစဉ်တွင် အဲဘတ်စ်ခရီးသည်တင်လေယာဉ် အစင်း ၅၀၀ ဝယ်ယူရေး သဘောတူညီချက်ကို တရုတ်နိုင်ငံနှင့် ရယူနိုင်ခဲ့ဖွယ်မရှိကြောင်း သိရသည်။သမ္မတရှီကျင်ပင်းနှင့် တွေ့ဆုံဆွေးနွေးစဉ်ယူကရိန်းစစ်ပွဲ အဆုံးသတ်ရေး ကြိုးပမ်းမှုများ မြှင့်
တင်ပေးရန်လည်း ပြင်သစ်သမ္မတက တောင်းဆိုခဲ့သည်။
