ရန်ကုန်တိုင်း ရွှေဆိုင်များအနေဖြင့် သိန်း ၁၀၀၀ အထက် အရောင်းအဝယ်ပြုပါက ငွေကြေးစုံစမ်းထောက်လှမ်းရေးအဖွဲ့ သို့ သတင်းပေးပို့ရန် ညွှန်ကြား

ရန်ကုန်တိုင်းဒေသကြီး အဖိုးတန်သတ္တု (ရွှေ) ရောင်းဝယ်သူများအသင်းက ရွှေဆိုင်များအနေဖြင့် ကျပ်သိန်း ၁၀၀၀ အထက် အရောင်းအဝယ်ပြုလုပ်ပါက ငွေကြေးဆိုင်ရာ စုံစမ်းထောက်လှမ်းရေးအဖွဲ့ (AML/CFT) သို့ မပျက်မကွက် သတင်းပေးပို့ရန် ထုတ်ပြန်ညွှန်ကြားခဲ့သည်။ ထို့အပြင် ကျပ်သိန်း ၂၀၀ ကျော်ပါက MMQR စနစ်ဖြင့် ငွေပေးချေမှုများ ပြုလုပ်ရမည်ဖြစ်ပြီး၊ ရွှေဈေးကွက် မတည်မငြိမ်ဖြစ်စေရန် ရည်ရွယ်၍ သိုလှောင်ခြင်း၊ ကြိုရောင်းကြိုဝယ် (လေပတ်ကား) ပြုလုပ်ခြင်း၊ ကံစမ်းမဲများနှင့် အလားသဏ္ဌာန်ဆောင်သည့် နည်းလမ်းများ မပြုလုပ်ရန်နှင့် လိုင်စင်ပါ စည်းကမ်းသတ်မှတ်ချက်များနှင့်အညီ ရောင်းဝယ်ရန် သတိပေးထားသည်။ ရွှေဆိုင်များသည် စံချိန်စံညွှန်းကိုက်ညီသည့် ရွှေ ၁ ကျပ်သား (၁၆.၃၂၉၃၂၅ ဂရမ်) ဖြင့်သာ ရောင်းဝယ်ရမည်ဖြစ်ကာ အခွန်ထမ်းဆောင်ရန်၊ ဗဟိုဘဏ်ညွှန်ကြားချက်များနှင့်အညီ ငွေကြေးလွှဲပြောင်းမှုများ ဆောင်ရွက်ရန်နှင့် အကောင်အထည်ဖော်ဆောင်ရွက်ရေးအရာရှိ ခန့်အပ်ထားရန်လည်း ညွှန်ကြားထားကြောင်း သိရသည်။