မလေးရှားနိုင်ငံ၊ ဂျိုဟိုးပြည်နယ်၊ ဘူကစ်အင်ဒါရှိ စားသောက်ဆိုင်တစ်ခုတွင် ပြုလုပ်ခဲ့သော ဝင်ရောက်စစ်ဆေးမှုအတွင်း တရားဝင် နေထိုင်ခြင်းမရှိသည့် နိုင်ငံခြားသား အလုပ်သမား ၂၄ ဦးကို ဖမ်းဆီးထိန်းသိမ်းခဲ့သည်ဟုဂျိုဟိုးပြည်နယ် လူဝင်မှုကြီးကြပ်ရေးဌာန (JIM Johor) က ထုတ်ပြန်ခဲ့သည်။အဆိုပါ ဝင်ရောက်စစ်ဆေးမှုတွင် စုစုပေါင်း လူ ၄၀ ဦးကို စစ်ဆေးခဲ့ရာ အသက် ၁၈ နှစ်မှ ၄၅ နှစ်ကြားရှိ မြန်မာအပါအဝင် တရားမဝင် နေထိုင်သူ ၂၄ ဦးကို ဖော်ထုတ် ဖမ်းဆီးနိုင်ခဲ့သည်။ဖမ်းဆီးခံရသူများအနက် မြန်မာနိုင်ငံသား ၁၆ ဦး (အမျိုးသား ၁၂ ဦး၊ အမျိုးသမီး ၄ ဦး) သည် အရေအတွက် အများဆုံးဖြစ်ပြီး ကျန်ရှိသူများမှာ အင်ဒိုနီးရှားနိုင်ငံသား ၇ ဦး (အမျိုးသား ၂ ဦး၊ အမျိုးသမီး ၅ ဦး) နှင့် ဗီယက်နမ်အမျိုးသမီး ၁ ဦးတို့ ပါဝင်ကြောင်း သိရသည်။လူဝင်မှုကြီးကြပ်ရေးဌာန၏ ထုတ်ပြန်ချက်အရ၊ ၎င်းတို့အားလုံးသည် မလေးရှားနိုင်ငံတွင် နေထိုင်ခွင့်နှင့် အလုပ်လုပ်ကိုင်ခွင့်ဆိုင်ရာ တရားဝင် ခွင့်ပြုမိန့်များ မပြသနိုင်ခဲ့ခြင်းကြောင့် ဖမ်းဆီးရခြင်း ဖြစ်သည်။ဖမ်းဆီးခံရသူ ၂၄ ဦးအား မလေးရှား လူဝင်မှုကြီးကြပ်ရေး အက်ဥပဒေ ၁၉၅၉/၆၃ (Immigration Act 1959/63) ၏ သက်ဆိုင်ရာ ပြဋ္ဌာန်းချက်များဖြင့် ဆက်လက်အရေးယူ ဆောင်ရွက်သွားမည်ဟု သိရသည်။
