ဒီဇင်ဘာလအတွင်း မွန်ပြည်နယ်အပါအဝင် တိုင်းနှင့်ပြည်နယ်အနှံ့အပြား၌ ရက်ရှည်မိုးရွာသွန်းနိုင်ဟု မိုးလေဝသနှင့် ဇလဗေဒညွှန်ကြားမှုဦးစီးဌာန ခန့်မှန်း

၂၀၂၅ ခုနှစ် ဒီဇင်ဘာလအတွင်း မွန်ပြည်နယ်အပါအဝင် တိုင်းနှင့် ပြည်နယ်အနှံ့အပြား၌ ရက်ရှည်မိုးရွာသွန်းနိုင်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာန (မိုးဇလ)၏ နိုဝင်ဘာလ ၃၀ ရက်နေ့ ထုတ်ပြန်ချက်အရ သိရသည်။ ယင်းထုတ်ပြန်ချက်အရ ရန်ကုန်တိုင်း၊ ပဲခူးတိုင်းအရှေ့ပိုင်း၊ ဧရာဝတီတိုင်း၊ တနင်္သာရီတိုင်းနှင့် မွန်ပြည်နယ်တို့တွင် ၄ ရက်မှ ၇ ရက်ခန့် ရက်ရှည်မိုးရွာသွန်းနိုင်ပြီး၊ အဆိုပါဒေသများတွင် ရွာသွန်းမြဲထက် ပိုမိုနိုင်ကြောင်း ခန့်မှန်းထားသည်။ ကျန်တိုင်းနှင့်ပြည်နယ်များဖြစ်သည့် နေပြည်တော်၊ မန္တလေးတိုင်း၊ စစ်ကိုင်းတိုင်း၊ ကချင်ပြည်နယ်နှင့် ရှမ်းပြည်နယ်တို့အပါအဝင် ဒေသများတွင်မူ ၁ ရက်မှ ၃ ရက်ခန့် မိုးထစ်ချုန်းရွာနိုင်ကြောင်း ဖော်ပြထားသည်။