နေပြည်တော်၊ ပုဗ္ဗသီရိမြို့နယ်ရှိ ငလျင်ဒဏ်သင့် သာသနိကအဆောက်အအုံများကို ပြန်လည်တည်ဆောက်လှူဒါန်း

နေပြည်တော်၊ ပုဗ္ဗသီရိမြို့နယ်အတွင်းရှိ ငလျင်ကြောင့် ပျက်စီးခဲ့သည့် သိမ်၊ ကျောင်းနှင့် ဘုရားစေတီများကို အသစ်ပြန်လည်တည်ဆောက်လှူဒါန်းခြင်းကို ယမန်နေ့ နိုဝင်ဘာ ၂၇ ရက်နေ့က လုပ်ဆောင်ခဲ့ကြောင်း သိရသည်။ပုဗ္ဗသီရိမြို့နယ်၊ ကံလှရပ်ကွက်တွင် ပြိုကျခဲ့သည့် ကံလှသိမ်တော်ကြီး အသစ်ဆောက်လုပ်ခြင်း၊ ဓမ္မရိပ်ငြိမ်စံကျောင်းတော် ပြုပြင်မွမ်းမံခြင်းနှင့် ရွှေကံပွင့် ဆုတောင်းပြည့်စေတီတော် အသစ်တည်ထား ရွှေထီးတော်တင်လှူဒါန်းခြင်းတို့ကို လုပ်ဆောင်ခဲ့ခြင်းဖြစ်သည်။ ယင်းလှူဒါန်းမှုကို မြန်မာ-တရုတ် ချစ်ကြည်ရေးအသင်း ဗဟိုမှ မိသားစုဝင်များနှင့် စေတနာရှင်များက စုပေါင်းလှူဒါန်းခဲ့ခြင်းဖြစ်ပြီး၊ ၎င်းတို့သည် နေပြည်တော်တွင် ငလျင်ဒဏ်သင့် သာသနိကအဆောက်အအုံများ၊ သီလရှင်စာသင်တိုက်များနှင့် ဘိုးဘွားရိပ်သာများကို ပြန်လည်ထူထောင်ရေးလုပ်ငန်းများ လုပ်ဆောင်နေသည့် ကုသိုလ်ပြုအစီအစဉ်၏ တစ်စိတ်တစ်ပိုင်းလည်း ဖြစ်သည်။