ရှမ်းပြည်တောင်ပိုင်း ဆီဆိုင်မြို့နယ်ရှိ ပြောင်းစိုက်တောင်သူများသည် ပြောင်းဈေးနှုန်း အဆမတန် ကျဆင်းခြင်းကြောင့် နှစ်နှစ်ဆက်တိုက် အရင်းပြန်မရဘဲ အရှုံးပေါ်နေကြောင်း သတင်းရရှိသည်။“ပြောင်းစိုက်ဖို့ အရင်းပဲကို သိန်း ၅၀ လောက်ရှိတယ်။ ပြန်ရတာက ကျပ်သိန်း ၄၀ တောင် မပြည့်ဘူး။ အကြွေးကလည်း အတိုးနဲ့ဆို မြုပ်နေပြီ ဘာမှကို မကျန်တာ ဒီနှစ်က။ ဈေးကောင်းမလားဆိုပြီး စိုက်ထားတာ၊ နောက်နှစ်ဆို တခြားသီးနှံ စိုက်မှရမယ်” - ဟု ပြောင်းစိုက်တောင်သူ အမျိုးသားတစ်ဦးက ပြောသည်။ဆီဆိုင်မြို့နယ်မှ ပြောင်းစိုက်တောင်သူများသည် အများအားဖြင့် ပွဲစားများနှင့်သာ ပြောင်းအရောင်း အဝယ် ပြုလုပ်ကြပြီး မြန်မာနိုင်ငံမှ ပြောင်းများကို တရုတ်နှင့် ထိုင်းနိုင်ငံဘက်သို့ အဓိက တင်ပို့နေခြင်း ဖြစ်သည်။ထိုသို့ ပြောင်းစိုက်တောင်သူများ အရှုံးပေါ်သောကြောင့် ပြောင်းအစားထိုး သီးနှံအဖြစ် ပဲစင်းငုံ များကို တိုးချဲ့ စိုက်ပျိုးလာကြကြောင်း သိရသည်။
