မန်စီးတီးနည်းပြ ဂွါဒီယိုလာက ချန်ပီယံလိဂ်ဝင်ခွင့်အတွက် အရေးပါသည့်ပွဲစဉ်တွင် အက်စတွန်ဗီလာအသင်းကို အနိုင်ကစားခဲ့ကြသည့် အသင်းကစားသမားများမှာ ဖိအားများကို ကိုင်တွယ်နိုင်သူများဖြစ်ကြောင်း ချီးကျူးခဲ့သည်။ မန်စီးတီးအသင်းသည် ဧပြီလ (၂၂) ရက်(အင်္ဂါနေ့)က ကစားခဲ့သည့် ပရီးမီးယားလိဂ်ပွဲစဉ် (၃၄)တွင် ချန်ပီယံလိဂ်ဝင်ခွင့်တစ်နေရာအတွက် ပြိုင်ဘက်ဖြစ်သည့် အက်စတွန်ဗီလာနှင့် ကစားခဲ့ရပြီး မက်သီးယပ်စ်နူးနက်စ်၏ နောက်ကျဂိုးကြောင့် (၂-၁) ဂိုးဖြင့် အနိုင်ရခဲ့သည်။
