အင်အားပြင်း ငလျင်ကြောင့် ၉မိုင်ခန့်ထိ မြေလွှာအက်ကွဲကြောင်း ဖြစ်ပေါ်ခဲ့ပြီး ၁၅ပေခန့်ထိ မြေသား အံလွဲမှုတွေဖြစ်ပေါ်ခဲ့

မြန်မာနိုင်ငံမှာ နှစ်ပေါင်း ၁၈၆နှစ်အတွင်း အဆိုးဝါးဆုံးဖြစ်တဲ့ မတ်လ ၂၈ရက်နေ့က လှုပ်ခတ်ခဲ့တဲ့ ငလျင်ကြောင့် မြေလွှာအက်ကွဲကြောင်းတွေဖြစ်ပေါ်လာမှုဟာ ၉ မိုင်ခန့်ရှိတယ်လို့ ကနဦးသိရပြီး အနည်းဆုံး ၂ပေကနေ ၁၅ ပေခန့်အထိ မြေသားတွေ အံလွဲသွားတယ်လို့ GeoMap-Myanmar ရဲ့ထုတ်ပြန်ထားချက်ကို ကိုးကားပြီး မိုးလေဝသပညာရှင် ဦးဝင်းနိုင်က အသိပေးမျှဝေထားပါတယ်။ဘေးတိုက်အရွေ့များတဲ့ ပြတ်ရွေ့အမျိုးအစားတစ်ခုဖြစ်တဲ့ စစ်ကိုင်းပြတ်ရွေ့က မင်းဝံတောင်ခြေရှိ ရေခါးအင်းရွာတစ်ဝိုက်မှာ အဓိကပြတ်ရွေ့အဖြစ် ရွေ့လျားသွားခဲ့ပြီး မြေလွှာအက်ကွဲကြောင်းတွေ ဖြစ်ပေါ် ခဲ့တာဖြစ်တယ်လို့ ပညာရှင်တချို့က သုံးသပ်ပြောဆိုထားပါတယ်။ဒါကြောင့် ကယ်ဆယ်ရေးအဖွဲ့တွေ၊ ဖြိုဖျက်ရှင်းလင်းရေးလုပ်ငန်းလုပ်နေကြသူတွေအားလုံးကို မိုးများလာတဲ့အခါ မြေကျွံနိုင်တာကြောင့် အဆောက်အဦးပြိုကျပြီးအန္တရာယ်ဖြစ်လာနိုင်လို့ မပြတ် သတိထားကြဖို့လည်း အသိပေးထားပါတယ်။မြေပြင်လေ့လာမှုတွေအရနဲ့ ဘူမိဗေဓဘာသာရပ်အရ အရည်ပျော်ခြင်း (Liquefaction) ကြောင့် တစ်ချို့နေရာတွေ မြေသားတည်ငြိမ်မှုမရှိသေးလို့ အမြန်လမ်း တံတားတွေမှာ အပေါ်ယံ လမ်းပြန်ခင်းလိုက်တာနဲ့ သွားလို့ရပေမဲ့ တန်များတဲ့ကားတွေ မဖြတ်သင့်သေးဘူးလို့ ပညာရှင်တစ်ချို့က ပြီးခဲ့တဲ့ ဧပြီ ၅ ရက်နေ့က သတိပေးထားပါတယ်။