ဂျပန်နိုင်ငံ၏ အကြီးဆုံး ကုန်စုံဆိုင် (Convenience Store) လုပ်ငန်းစုဖြစ်သည့် 7-Eleven ၏ မိခင်ကုမ္ပဏီ Seven & i Holdings သည် ၎င်းတို့၏ ရေရှည် "တစ်ကိုယ်တော်ရပ်တည်ရေးမူဝါဒ" ကို ပြောင်းလဲကာ ကုမ္ပဏီ၏ ရှယ်ယာအချို့ကို SoftBank Corp နှင့် ဒစ်ဂျစ်တယ်ငွေပေးချေမှုလုပ်ငန်း PayPay Corp တို့ထံ ရောင်းချရန် ဆွေးနွေးမှုများ ပြုလုပ်နေကြောင်း သိရသည်။အဆိုပါ အစုရှယ်ယာ အရောင်းအဝယ်မှာ ဂျပန်ယန်း ဘီလီယံ ရာပေါင်းများစွာ (အမေရိကန်ဒေါ်လာ ၁.၈၅ ဘီလီယံခန့်) အထိ တန်ဖိုးရှိနိုင်ပြီး Seven & i က ရှယ်ယာအသစ်များ ထုတ်ဝေကာ SoftBank၊ PayPay တို့အပြင် Sumitomo Mitsui Financial Group ၏ ခရက်ဒစ်ကတ်လုပ်ငန်းခွဲတစ်ခုပါ ပူးပေါင်းဝယ်ယူရန် ရည်ရွယ်ထားခြင်း ဖြစ်သည်။ယခု မဟာဗျူဟာမြောက် မဟာမိတ်ဖွဲ့မှုမှတစ်ဆင့် Seven & i အနေဖြင့် ၎င်းတို့၏ 7-Eleven ဆိုင်ခွဲပေါင်း ၂၂,၀၀၀ ကျော်တွင် PayPay ၏ အသုံးပြုသူ ၇၄ သန်းရှိသော ငွေပေးချေမှုစနစ်နှင့် SoftBank ၏ AI နည်းပညာသုံး စတိုးဆိုင်စီမံခန့်ခွဲမှုစနစ်များကို ပေါင်းစပ်ပြီး လုပ်ငန်းများ ပိုမိုအဆင့်မြှင့်တင်နိုင်ရန် မျှော်လင့်ထားကြသည်။ ကုမ္ပဏီများအကြား ဆွေးနွေးမှုများကို ယခု ၂၀၂၆ ခုနှစ် နွေရာသီကာလအတွင်း အပြီးသတ် လက်မှတ်ရေးထိုးနိုင်ရန် ရည်မှန်းထားကြောင်း သိရသည်။
