ထိုင်းနိုင်ငံ၌ အလုပ်ထုတ်ခံရသည့် မြန်မာလုပ်သား ၃၈ ဦး ကိုးလနီးပါးအကြာတွင် နစ်နာကြေးခွဲပေးရန် အလုပ်ရှင်နှင့် သဘောတူညီမှုရရှိ

ထိုင်းနိုင်ငံ၊ နခွန်ပထုံခရိုင်၊ အုန်းယိုင်ဒေသရှိ ပိတ်စဆေးဆိုးပန်းရိုက်အလုပ်ရုံတစ်ခုမှ ကြိုတင်အကြောင်းကြားခြင်းမရှိဘဲ ၂၀၂၅ ခုနှစ် အောက်တိုဘာလတွင် အလုပ်ထုတ်ခံခဲ့ရသည့် မြန်မာလုပ်သား ၃၈ ဦးသည် ကိုးလနီးပါးအကြာ ဇူလိုင်လ ၁၂ ရက်တွင်မှ နစ်နာကြေးရရှိရန် အလုပ်ရှင်နှင့် သဘောတူညီမှု ရရှိခဲ့ကြောင်း MHAC မဟာမိတ်အဖွဲ့ထံမှ သိရသည်။အဆိုပါလုပ်သားများသည် လုပ်သက် ၃ လကျော်မှ နှစ်ပေါင်း ၂၀ ကျော်အထိ ရှိသူများဖြစ်ပြီး နစ်နာကြေးပမာဏ များပြားသဖြင့် အလုပ်ရှင်ဘက်မှ တစ်လတစ်ကြိမ်ဖြင့် ၄ ကြိမ် ခွဲပေးရန် အလုပ်သမားတရားရုံး တရားသူကြီးနှင့် MHAC အဖွဲ့ရှေ့နေများရှေ့မှောက်တွင် လက်မှတ်ရေးထိုး သဘောတူခဲ့ခြင်းဖြစ်သည်။အလုပ်သမားများဘက်မှလည်း ယင်းသို့ ခွဲပေးသည်ကို သဘောတူခဲ့ကြပြီး အလုပ်ရှင်က ထပ်မံတိမ်းရှောင်ပါက ဆက်လက်တရားစွဲဆိုသွားမည်ဖြစ်ကြောင်း သိရသည်။