ဗီယက်နမ်မြောက်ပိုင်း ဟာဂန်း (Ha Giang) ဒေသ၏ နာမည်ကျော် မော်တော်ဆိုင်ကယ်ပတ်လမ်း (Ha Giang Loop) သို့ လာရောက်ကြသည့် နိုင်ငံတကာခရီးသွားများသည် သွားလာရုံတင်မကဘဲ ဒေသတွင်း သဘာဝပတ်ဝန်းကျင် စိမ်းလန်းစိုပြည်ရေးအတွက် သစ်ပင်များ စိုက်ပျိုးပေးသည့် အစီအစဉ်တစ်ခုတွင် တက်ကြွစွာ ပါဝင်နေကြသည်။
ဤအစီအစဉ်ကို Tuyen Quang ပြည်နယ်အခြေစိုက် "Jasmine Tours" ခရီးသွားကုမ္ပဏီက ပြီးခဲ့သည့် ဧပြီလတွင် စတင်မိတ်ဆက်ခဲ့ခြင်း ဖြစ်သည်။ မိုးရာသီကာလများတွင် ဟာဂန်းလမ်းတစ်လျှောက် မြေပြိုခြင်းနှင့် တောင်ကုန်းများ ကတုံးဖြစ်လာခြင်းတို့ကို သတိပြုမိရာမှ ခရီးသွားဧည့်သည်များ ကိုယ်တိုင် သစ်ပင်စိုက်ပျိုးနိုင်မည့် အစီအစဉ်ကို ဖန်တီးခဲ့ခြင်း ဖြစ်သည်။ ခရီးစဉ်မစတင်မီ ဧည့်သည်တစ်ဦးစီအား ပျိုးပင်တစ်ပင်စီ ပေးအပ်ထားပြီး ၎င်းတို့သွားရောက်မည့် လမ်းခရီးတစ်လျှောက် သတ်မှတ်ထားသော နေရာများတွင် ကိုယ်တိုင်တူးဆွ စိုက်ပျိုးကြရသည်။
လက်ရှိအချိန်အထိ နိုင်ငံတကာခရီးသွားများ စိုက်ပျိုးခဲ့သည့် ပျိုးပင်ပေါင်း ၅,၂၀၀ ကျော် ရှိနေပြီဖြစ်ပြီး ဒေသခံတောင်သူများ၏ မြေလွတ်များပေါ်တွင် စိုက်ပျိုးပေးခဲ့ခြင်း ဖြစ်သည်။ ခရီးသွားကုမ္ပဏီအနေဖြင့် ဤ "The Green Road" စီမံကိန်းကို ၁၃ ကီလိုမီတာအထိ ထပ်မံတိုးချဲ့သွားရန် ပြင်ဆင်နေပြီး၊ ယခုကဲ့သို့ စဉ်ဆက်မပြတ် ခရီးသွားလုပ်ငန်း (Sustainable Tourism) ဖော်ဆောင်ခြင်းက ဟာဂန်းဒေသကို ပိုမိုစိမ်းလန်းစိုပြည်စေကာ ခရီးသွားများကိုလည်း ဆွဲဆောင်နိုင်လိမ့်မည်ဟု မျှော်လင့်ထားကြောင်း သိရသည်။
