၂၀၂၆ ခုနှစ် ပထမ ၄ လအတွင်း မြန်မာနိုင်ငံသား ၇ သိန်းနီးပါး ထိုင်းနိုင်ငံအတွင်းသို့ ဝင်ရောက်ခဲ့ကြောင်း IOM ထုတ်ပြန်

ကုလသမဂ္ဂ ရွှေ့ပြောင်းသွားလာရေးအေဂျင်စီ (IOM) ၏ ကိန်းဂဏန်းအချက်အလက်အသစ်များအရ ၂၀၂၆ ခုနှစ်၊ ဇန်နဝါရီလမှ ဧပြီလအထိ လေးလတာကာလအတွင်း မြန်မာနိုင်ငံသား ၆၈၇,၀၀၀ ခန့်သည် တာ့ခ် (မဲဆောက်)၊ ရနောင်း၊ ကန်ချနဘူရီနှင့် ချင်းရိုင် စသည့် အဓိကနယ်စပ်ဂိတ်များမှတစ်ဆင့် ထိုင်းနိုင်ငံအတွင်းသို့ ဝင်ရောက်ခဲ့ကြသည်။ IOM က ကောက်ယူခဲ့သည့် စာရင်းဇယားများအရ ဝင်ရောက်လာသူ ၃,၅၀၀ ကျော်အနက် ၄၁ ရာခိုင်နှုန်းမှာ တရားဝင် စာရွက်စာတမ်း အထောက်အထား မရှိကြကြောင်း သိရသည်။ ၎င်းတို့သည် ကုန်သွယ်ရေး၊ အလည်အပတ်၊ အလုပ်အကိုင်ရှာဖွေရန်နှင့် စစ်ပွဲရှောင်ရန် စသည့် အကြောင်းအရင်းအမျိုးမျိုးဖြင့် ဝင်ရောက်လာကြခြင်းဖြစ်ပြီး လက်ရှိ ထိုင်းနိုင်ငံရောက် မြန်မာအသိုင်းအဝိုင်းမှာ ယခင်ကဲ့သို့ လုပ်သားအင်အားသက်သက် မဟုတ်တော့ဘဲ ပုံစံပြောင်းလဲလာနေကြောင်း သိရသည်။