မကွေးတိုင်းဒေသကြီး၊ မင်းဘူး(စကု)မြို့နယ်တွင် ယခုရက်ပိုင်းအတွင်း ဧရာဝတီမြစ်ရေ သိသိသာသာ မြင့်တက်လာခြင်းကြောင့် အနိမ့်ပိုင်းကျေးရွာအချို့၏ ရွာဘေးပတ်ဝန်းကျင်သို့ မြစ်ရေများ စတင်ဝင်ရောက်နေပြီဖြစ်ကြောင်း သိရသည်။ မိုးလေဝသနှင့်ဇလဗေဒညွှန်ကြားမှုဦးစီးဌာန၏ ဇူလိုင်လ ၄ ရက် မွန်းတည့် ၁၂ နာရီခွဲအချိန် တိုင်းထွာချက်အရ မင်းဘူးမြို့၌ ဧရာဝတီမြစ်ရေသည် ၁,၃၉၃ စင်တီမီတာသို့ ရောက်ရှိနေပြီး စိုးရိမ်ရေမှတ်သို့ ရောက်ရှိရန် ၃၀၇ စင်တီမီတာသာ လိုတော့ကြောင်း သိရသည်။ လက်ရှိတွင် မြစ်ရေဝင်ရောက်မှုမှာ စိုးရိမ်ရသည့်အခြေအနေ မရှိသေးသော်လည်း မြစ်ကမ်းဘေးတစ်လျှောက် နေထိုင်သူများအနေဖြင့် မြစ်ရေကြီးခြင်းနှင့် ကမ်းပြိုဘေးအန္တရာယ်များကို သတိပြုကြရန် တာဝန်ရှိသူများက သတိပေးထားသည်။
