တက္ကသိုလ်ဝင်စာမေးပွဲ အောင်မြင်သည့် အကျဉ်းသားများနှင့် လူငယ်သင်တန်းကျောင်းမှ ကျောင်းသားများအတွက် အမျိုးသားလူ့အခွင့်အရေးကော်မရှင် ဂုဏ်ယူဝမ်းမြောက်ကြောင်း ထုတ်ပြန်

၂၀၂၆ ခုနှစ် တက္ကသိုလ်ဝင်စာမေးပွဲတွင် အကျဉ်းသား၊ အကျဉ်းသူများနှင့် လူငယ်သင်တန်းကျောင်းများမှ ထူးချွန်စွာ အောင်မြင်ခဲ့ကြသူများအတွက် ဂုဏ်ယူဝမ်းမြောက်ကြောင်း မြန်မာနိုင်ငံအမျိုးသားလူ့အခွင့်အရေးကော်မရှင်က ဇွန်လ ၂၈ ရက်တွင် ထုတ်ပြန်ခဲ့သည်။ ယခုနှစ်တွင် အင်းစိန်ဗဟိုအကျဉ်းထောင်မှ အကျဉ်းသား ၃၆ ဦးနှင့် မန္တလေးဗဟိုအကျဉ်းထောင်မှ ၁၀ ဦး အောင်မြင်ခဲ့ပြီး ၎င်းတို့အနက် ၃ ဘာသာဂုဏ်ထူးရှင် ၅ ဦး၊ ၂ ဘာသာဂုဏ်ထူးရှင် ၆ ဦးနှင့် ၁ ဘာသာဂုဏ်ထူးရှင် ၆ ဦး ပါဝင်ကြောင်း၊ ထို့ပြင် ကြည့်မြင်တိုင်မျက်မမြင်ကျောင်းမှ အမြင်အာရုံမသန်စွမ်းသူ ၂ ဦး၊ ကျိုက်ဝိုင်းလူငယ်သင်တန်းကျောင်းမှ ၃ ဦး၊ မန္တလေးလူငယ်သင်တန်းကျောင်းမှ ၄ ဦးအပါအဝင် လူငယ်သင်တန်းကျောင်းများနှင့် မသန်စွမ်းကျောင်းများမှလည်း အသီးသီး အောင်မြင်ခဲ့ကြကြောင်း သိရသည်။ ကော်မရှင်အနေဖြင့် အောင်မြင်သူအားလုံးကို လှိုက်လှဲစွာ ဂုဏ်ယူပြီး အကျဉ်းသား/သူများ၊ ကလေးသူငယ်များနှင့် မသန်စွမ်းသူများ ပညာသင်ယူခွင့် ဆက်လက်ရရှိစေရေးအတွက် သက်ဆိုင်ရာက ဆောင်ရွက်ပေးသွားမည်ကို ယုံကြည်ကြောင်း ထည့်သွင်းထုတ်ပြန်ထားသည်။