ဂျပန်ဝန်ကြီးအဖွဲ့အတွင်းရေးမှူးရုံးနှင့် ကာကွယ်ရေးဝန်ကြီးဌာနတို့တွင် နိုင်ငံတော်လျှို့ဝှက်ချက် အုပ်ချုပ်ရေးစာရွက်စာတမ်းများကို ပေါ့ဆစွာကိုင်တွယ်မှု တွေ့ရှိခဲ့

ဂျပန်နိုင်ငံ ဝန်ကြီးအဖွဲ့အတွင်းရေးမှူးရုံးသည် ပြီးခဲ့သည့် ၂၀၂၅ ခုနှစ်အတွင်းက အထူးသတ်မှတ်ထားသော နိုင်ငံတော်လျှို့ဝှက်ချက်များ (Specially Designated Secrets) ပါဝင်သည့် အုပ်ချုပ်ရေးဆိုင်ရာ စာရွက်စာတမ်းတွဲပေါင်း ၉,၄၂၄ တွဲကို စနစ်တကျမရှိဘဲ ပေါ့ဆစွာ ကိုင်တွယ်သိမ်းဆည်းခဲ့ကြောင်း သောကြာနေ့ တွင် ထုတ်ပြန်သည့် အစိုးရအစီရင်ခံစာအရ သိရသည်။အဆိုပါ လျှို့ဝှက်စာရွက်စာတမ်းများကို သော့ခတ်နိုင်သော လုံခြုံစိတ်ချရသည့် သေတ္တာများ (Safes) အတွင်း ထည့်သွင်းသိမ်းဆည်းရမည့်အစား ရုံးခန်းစားပွဲတင် အံဆွဲများထဲတွင် ဒီအတိုင်း ပစ်ထားခြင်းမျိုး အပါအဝင် မလျော်ကန်သော နည်းလမ်းများဖြင့် သိမ်းဆည်းထားခဲ့ကြခြင်း ဖြစ်သည်။ထို့ပြင် ကာကွယ်ရေးဝန်ကြီးဌာနတွင်လည်း စည်းကမ်းဖောက်ဖျက်မှု ၁၆ ခု ရှိခဲ့ကြောင်း ဖော်ပြထားသည်။ယင်းအထဲတွင် ပြည်သူ့မှတ်တမ်းစီမံခန့်ခွဲမှုဥပဒေ၌ ပြဌာန်းထားသည့်အတိုင်း ဝန်ကြီးချုပ်၏ သဘောတူညီချက်ကို ရယူရမည်ဟူသော လုပ်ထုံးလုပ်နည်းများကို မလိုက်နာဘဲ လျှို့ဝှက်ချက်များပါဝင်သည့် စာရွက်စာတမ်းများကို စနစ်တကျမဟုတ်ဘဲ စွန့်ပစ်ဖျက်ဆီးခဲ့မှုများ ပါဝင်သည်။၂၀၂၅ ခုနှစ် ကုန်ဆုံးချိန်အထိ ဂျပန်နိုင်ငံ၏ စုစုပေါင်းအထူးသတ်မှတ်လျှို့ဝှက်ချက် အရေအတွက်မှာ ၈၅၄ ခု ရှိနေကာ၊ အဆိုပါ လျှို့ဝှက်ချက်များပါဝင်သော စာရွက်စာတမ်း အရေအတွက်မှာလည်း စုစုပေါင်း ၈၀၃,၃၅၈ စောင်အထိ ရှိလာခဲ့သည်။ ဂျပန်နိုင်ငံအနေဖြင့် ၎င်း၏ ထောက်လှမ်းရေးနှင့် သတင်းအချက်အလက် စွမ်းရည်များကို မြှင့်တင်ရန် ကြိုးပမ်းနေချိန်တွင် နိုင်ငံတော်လျှို့ဝှက်ချက်များ ကာကွယ်ရေးကို ပေါ့ဆစွာ မလုပ်ဆောင်ရန် ကျွမ်းကျင်သူများက တိုက်တွန်းထားသည်။