ဗီယက်နမ်၊ ဒါနန်း (Da Nang) အပြည်ပြည်ဆိုင်ရာလေဆိပ် အဆင့်မြှင့်တင်ရန် ဒေါ်လာ ၆၈၄ သန်းကျော် သုံးစွဲမည့် စီမံကိန်း တင်ပြ

ဗီယက်နမ်လေဆိပ်ကော်ပိုရေးရှင်း (ACV) သည် ဒါနန်းအပြည်ပြည်ဆိုင်ရာလေဆိပ်၏ လေယာဉ်ပြေးလမ်း (Runway)၊ လေယာဉ်ရပ်နားစခန်း (Apron) နှင့် အခြားအခြေခံအဆောက်အအုံများကို ဘက်စုံအဆင့်မြှင့်တင်ရန်အတွက် ဗီယက်နမ်ဒေါင် ၁၇.၃ ထရီလီယံ (အမေရိကန်ဒေါ်လာ ၆၈၄ သန်းကျော်) ကုန်ကျမည့် စီမံကိန်းအဆိုပြုလွှာကို ပို့ဆောင်ရေးဝန်ကြီးဌာနထံ တင်ပြလိုက်သည်။ အဆိုပါ ရင်းနှီးမြှုပ်နှံမှုစီမံကိန်းအောက်တွင် လက်ရှိလေယာဉ်ပြေးလမ်းများကို ပြန်လည်အဆင့်မြှင့်တင်ခြင်း၊ လေယာဉ်ရပ်နားရန်နေရာသစ်များ တိုးချဲ့တည်ဆောက်ခြင်းနှင့် ကုန်စည်ပို့ဆောင်ရေးဂိတ် (Cargo Terminal) အသစ်များ တည်ဆောက်ခြင်းတို့ ပါဝင်မည်ဖြစ်ပြီး၊ စီမံကိန်းကို ၂၀၂၆ ခုနှစ်မှ ၂၀၃၀ ပြည့်နှစ်အတွင်း အကောင်အထည်ဖော်ရန် ရည်မှန်းထားသည်။ ယခုကဲ့သို့ အဆင့်မြှင့်တင်ရခြင်းမှာ ဒါနန်းမြို့သို့ ဝင်ရောက်လာသည့် ပြည်တွင်းပြည်ပ ခရီးသည်နှင့် လေကြောင်းကုန်စည် ပမာဏ စဉ်ဆက်မပြတ် တိုးတက်လာခြင်းကြောင့် လေဆိပ်အတွင်း ဝန်ပိနေမှုများကို ဖြေရှင်းရန်နှင့် အလယ်ပိုင်းဒေသ၏ စီးပွားရေးနှင့် ခရီးသွားကဏ္ဍကို ပိုမိုတွန်းအားပေးရန် ရည်ရွယ်ခြင်း ဖြစ်သည်။