လာအို နိုင်ငံ့ဝန်ထမ်းများအတွက် ဂျပန်က ဒေါ်လာ ၂.၃ သန်းကျော်တန်ဖိုးရှိ ပညာသင်ဆုထောက်ပံ့ရန် သဘောတူ

ဂျပန်နိုင်ငံအစိုးရသည် လာအိုနိုင်ငံ၏ လူသားအရင်းအမြစ် ဖွံ့ဖြိုးတိုးတက်ရေးစီမံကိန်း (JDS) အတွက် ဂျပန်ယန်း ၃၇၈ သန်း (အမေရိကန်ဒေါ်လာ ၂.၃ သန်းကျော်) တန်ဖိုးရှိ အခမဲ့ကူညီထောက်ပံ့မှုပေးရန် လာအိုနိုင်ငံဆိုင်ရာ ဂျပန်သံအမတ်ကြီး ကိုအိဇုမိ ဆွတ်တိုမု (Koizumi Tsutomu) နှင့် လာအိုနိုင်ငံခြားရေးဒုဝန်ကြီး အနူဖတ် ဗောင်နော်ကီအို (Anouphap Vongnorkeo) တို့ ယမန်နေ့က ဗီယင်ကျန်းမြို့၌ သဘောတူညီချက် လက်မှတ်ရေးထိုးခဲ့ကြသည်။ အဆိုပါ JDS ပညာသင်ဆုအစီအစဉ်အောက်တွင် ဂျပန်နိုင်ငံသည် ယခုအချိန်အထိ လာအိုနိုင်ငံ့ဝန်ထမ်းငယ်ပေါင်း ၅၀၀ ကျော်ကို ဂျပန်နိုင်ငံရှိ ထိပ်တန်းတက္ကသိုလ်များတွင် မာစတာနှင့် ပါရဂူဘွဲ့များ တက်ရောက်နိုင်ရန် ပံ့ပိုးပေးခဲ့ပြီးဖြစ်ကာ၊ ယခုထောက်ပံ့မှုသည် လာအိုနိုင်ငံ၏ စီးပွားရေး၊ ပြည်သူ့အုပ်ချုပ်ရေးနှင့် နိုင်ငံတကာဆက်ဆံရေး စသည့်ကဏ္ဍများတွင် မူဝါဒချမှတ်မည့် ဝန်ထမ်းများ၏ စွမ်းဆောင်ရည်ကို မြှင့်တင်ပေးရန်နှင့် နှစ်နိုင်ငံမဟာဗျူဟာမြောက် မိတ်ဖက်ဆက်ဆံရေးကို ပိုမိုခိုင်မာစေရန် ရည်ရွယ်ခြင်းဖြစ်သည်။