မလေးရှားနိုင်ငံ၊ ကွာလာလမ်ပူမြို့ရှိ မြန်မာသံရုံးတွင် နိုင်ငံကူးလက်မှတ် (ပတ်စ်ပို့) သက်တမ်းတိုးခြင်းနှင့် ပျောက်ဆုံး/ပျက်စီးမှုများအတွက် ယခင်အသုံးပြုခဲ့သည့် QR ရက်ချိန်းစနစ်ကို လာမည့် ဇူလိုင်လ ၁ ရက်နေ့မှစတင်ကာ လုံးဝဖျက်သိမ်းသွားမည်ဖြစ်ပြီး၊ ရက်ချိန်းအသစ်များကို WhatsApp မှတစ်ဆင့်သာ ပြန်လည်ရယူရမည်ဖြစ်ကြောင်း ဇွန် ၂၇ ရက်တွင် သံရုံးက ထုတ်ပြန်ကြေညာလိုက်သည်။ သံရုံးအနေဖြင့် ပြီးခဲ့သည့် ဇွန်လ ၁၉ ရက်က ပတ်စ်ပို့လုပ်ငန်းစဉ်များကို ၃ ရက်ကြာမှ ထုတ်ပေးမည်ဟု ထုတ်ပြန်ခဲ့သော်လည်း၊ ယခုထုတ်ပြန်ချက်တွင်မူ "နေ့ချင်းပြီးစနစ်" ဖြင့် ပြန်လည်ပြောင်းလဲ ဆောင်ရွက်ပေးမည်ဟု အသိပေးထားသည်။ ထို့ကြောင့် ယခင် QR ရက်ချိန်း ရရှိထားသူများအပါအဝင် ပတ်စ်ပို့လျှောက်ထားလိုသူများသည် ဇူလိုင် ၁ ရက်မှစ၍ WhatsApp မှတစ်ဆင့် ရက်ချိန်းပြန်လည်ရယူကြရမည်ဖြစ်ပြီး၊ အလုပ်လုပ်ကိုင်ခွင့်ပါမစ် သက်တမ်းကုန်ဆုံး၍ Special Pass ကိုင်ဆောင်ထားသူများနှင့် ပါမစ်သက်တမ်းကုန်ဆုံးရန် ရက်နီးကပ်နေသူများကို ဦးစားပေး ဆောင်ရွက်ပေးသွားမည်ဖြစ်သည်။ သို့သော် မည်သူမည်ဝါဖြစ်ကြောင်း သက်သေခံလက်မှတ် (CI) လျှောက်ထားသူများမှာမူ ယခင်ရရှိထားသည့် QR ရက်ချိန်းအတိုင်း ဆက်လက်လာရောက်နိုင်ကြောင်းနှင့် အသေးစိတ်အချက်အလက်များကို သံရုံး၏ တရားဝင်လူမှုကွန်ရက်စာမျက်နှာနှင့် ဝက်ဘ်ဆိုက်တို့တွင် ဝင်ရောက်ကြည့်ရှုနိုင်ကြောင်း သိရသည်။
