ကမ္ဘာလုံးဆိုင်ရာ ရင်းနှီးမြှုပ်နှံသူများအကြား ကာလရှည်ကြာ "တန်ဖိုးနည်းစတော့ဈေးကွက်" (Value Market) အဖြစ်သာ ရှုမြင်ခံခဲ့ရသည့် ဂျပန်နိုင်ငံ၏ ရှယ်ယာဈေးကွက်သည် လက်ရှိတွင် ဉာဏ်ရည်တု (AI) နှင့် ဆက်စပ်နေသော နည်းပညာကုမ္ပဏီများ၏ အရှိန်အဟုန်ဖြင့် တိုးတက်လာမှုကြောင့် တိုးတက်မှုနှုန်းမြင့်မားသည့် "တိုးတက်မှုစတော့များ" (Growth Stocks) ဘက်သို့ အရှိန်အဟုန်ဖြင့် ပြောင်းလဲဆွဲဆောင်လျက်ရှိသည်။ ယခုအခါ AI အခြေခံအဆောက်အအုံ တည်ဆောက်ရေးတွင် ပါဝင်သည့် ဂျပန်ကုမ္ပဏီများသည် စျေးကွက်တန်ဖိုးအမြင့်ဆုံး အဆင့်ရပ်တည်ချက်များသို့ တက်လှမ်းလာပြီး ဆယ်စုနှစ်ပေါင်းများစွာ ထိပ်ဆုံးက ဦးဆောင်ခဲ့သည့် မော်တော်ယာဉ်နှင့် ဆက်သွယ်ရေးလုပ်ငန်းကြီးများကို ကျော်တက်လာပြီ ဖြစ်သည်။
ဤပြောင်းလဲမှု၏ ထင်ရှားသော သက်သေအဖြစ် ယခုလအတွင်း မန်မိုရီချစ်ပ် (Memory Chip) ထုတ်လုပ်သည့် Kioxia Holdings ကုမ္ပဏီသည် ကမ္ဘာကျော် Toyota မော်တော်ယာဉ်ကုမ္ပဏီကို ကျော်ဖြတ်ကာ စျေးကွက်တန်ဖိုး အမြင့်ဆုံးကုမ္ပဏီအဖြစ် ပထမဆုံးအကြိမ် ရောက်ရှိလာခဲ့သည်။ ထို့ပြင် SoftBank Group သည်လည်း Toyota ၏ စျေးကွက်တန်ဖိုးကို ခေတ္တကျော်တက်နိုင်ခဲ့ပြီး အခြား AI နှင့် ဆက်စပ်သည့် နည်းပညာကုမ္ပဏီအသစ်များစွာပါ စတော့ဈေးကွက်၏ ထိပ်တန်းစာရင်းများထဲသို့ တိုးဝင်လာခဲ့သည်။ ရင်းနှီးမြှုပ်နှံမှု ကျွမ်းကျင်သူများက ယခုဖြစ်စဉ်သည် ဂျပန်စတော့ဈေးကွက်၏ သမိုင်းဝင် အသွင်ကူးပြောင်းမှုတစ်ခုဖြစ်ပြီး နိုင်ငံတကာမှ အငြိမ်းစားပင်စင်ရန်ပုံငွေအဖွဲ့များအပါအဝင် နိုင်ငံခြားရင်းနှီးမြှုပ်နှံသူအမြောက်အမြားကို ပိုမိုဝင်ရောက်လာစေရန် ဆွဲဆောင်နေကြောင်း သုံးသပ်ထားကြသည်။ သို့သော်လည်း တစ်ဖက်တွင်လည်း AI လှိုင်းလုံးကြီး ပြောင်းပြန်လှန်သွားပါက ပြင်းထန်သော စျေးကွက်ပြင်ဆင်မှု (Market Correction) နှင့် ရင်ဆိုင်ရနိုင်သည့် စွန့်စားရမှုများလည်း ရှိနေကြောင်း သတိပေးထားသည်။
