ဂျပန်နိုင်ငံ၊တိုဟိုကုဒေသတွင် အင်အား ၆.၉ အဆင့်ရှိသော အင်အားပြင်းငလျင် လှုပ်ခတ်၊ ဆူနာမီသတိပေးချက် ထုတ်ပြန်ထားခြင်းမရှိ

ဂျပန်နိုင်ငံ မြောက်ပိုင်း တိုဟိုကု (Tohoku) ဒေသတွင် ယနေ့ ဇွန် ၂၅ ရက် (နံနက် ၇ နာရီ ၃၀ မိနစ်ခန့်) က အင်အားပြင်းငလျင်တစ်ခု လှုပ်ခတ်သွားခဲ့သည်။ ဂျပန်မိုးလေဝသအေဂျင်စီ (JMA) ၏ ထုတ်ပြန်ချက်အရ ငလျင်ဗဟိုချက်မှာ အီဝါတေး (Iwate) ပြည်နယ် ကမ်းလွန်ပင်လယ်ပြင် ရေအနက် ၅၀ ကီလိုမီတာကို အခြေခံပြီး ပဏာမပမာဏ မဂ္ဂနီကျု ၆.၉ ရှိကြောင်း သိရသည်။ ငလျင်ကြောင့် အာအိုမိုရီ (Aomori) ပြည်နယ် ဟာရှီကာမီ (Hashikami) မြို့တွင် ဂျပန်ငလျင်တိုင်းတာမှုစံနှုန်း (Shindo) အရ ဒုတိယအမြင့်ဆုံးအဆင့်ဖြစ်သော "အဆင့် ၆ အထက် (Upper 6)" အထိ ရှိခဲ့ကာ မတ်တပ်ရပ်ရန်ပင် မဖြစ်နိုင်ဘဲ ဝပ်တွားသွားရလောက်သည်အထိ ပြင်းထန်ခဲ့သည်။

လက်ရှိအချိန်အထိ ဆူနာမီ (Tsunami) သတိပေးချက် ထုတ်ပြန်ထားခြင်းမရှိသလို သေဆုံးဒဏ်ရာရမှု သတင်းများလည်း မရရှိသေးပေ။ သို့သော် အာအိုမိုရီပြည်နယ် ဟာချီနိုဟေး (Hachinohe) မြို့ရှိ ဓာတ်လှေကားတစ်ခုအတွင်း လူအချို့ ပိတ်မိနေနိုင်ကြောင်း သတင်းများ ထွက်ပေါ်နေသည်။ ဒေသတွင်းရှိ ဟီဂါရှီဒိုရီ (Higashidori) နှင့် အိုနာဂါဝါ (Onagawa) အပါအဝင် နျူကလီးယားဓာတ်အားပေးစက်ရုံများတွင် တစ်စုံတစ်ရာ ပုံမှန်မဟုတ်မှု မရှိကြောင်း သိရသည်။ ငလျင်ကြောင့် တိုဟိုကု ရှင်ကန်းဆင် (Tohoku Shinkansen) ကျည်ဆန်ရထားလိုင်း အပါအဝင် ရထားလိုင်းအချို့ကို ယာယီရပ်ဆိုင်းထားသည်။ ဝန်ကြီးချုပ် စာနာအေတာကာအီချီ (Sanae Takaichi) က အစိုးရအနေဖြင့် အခြေအနေများကို စောင့်ကြည့်နေပြီး လာမည့်တစ်ပတ်အတွင်း အလားတူအင်အားရှိသော ငလျင်များ ထပ်မံလှုပ်ခတ်လာနိုင်သဖြင့် ပြည်သူများ သတိပြုကြရန် တိုက်တွန်းထားသည်။