ထိုင်းတွင် ရွှေ့ပြောင်းလုပ်သားများ အလုပ်ပါမစ်လျှောက်ရာ၌ လာဘ်စားမှုများကို နှိမ်နင်းပြီး မှတ်ပုံတင်ကာလအသစ် ပြန်ဖွင့်ပေးမည်

ထိုင်းနိုင်ငံတွင် e-WorkPermit လျှောက်ထားမှု ကြန့်ကြာခြင်းကို အခွင့်ကောင်းယူ၍ ပွဲစားခ ခေါင်းပုံဖြတ်နေမှုများကို အာဏာပိုင်များက ပြင်းထန်စွာ နှိမ်နင်းနေပြီး၊ ကြန့်ကြာမှုများကို ဖြေရှင်းရန် ယာယီအလုပ်လုပ်ကိုင်ခွင့်လက်မှတ်များ ထုတ်ပေးသွားမည်ဖြစ်ကြောင်း အလုပ်သမားဝန်ကြီး မစ္စတာချူလာဖန်က ပြောကြားသည်။ စနစ်ပြင်ပသို့ ရောက်ရှိသွားသည့် လုပ်သားများအတွက် မှတ်ပုံတင်သက်တမ်းတိုးခြင်းနှင့် မှတ်ပုံတင်ခြင်းလုပ်ငန်းစဉ်အသစ်ကို လာမည့် ဇူလိုင်လအတွင်း ဖွင့်လှစ်ပေးရန် ပြင်ဆင်နေသည့်အပြင်၊ သက်တမ်း ၄ နှစ်ပြည့်သွားသည့် မြန်မာရွှေ့ပြောင်းလုပ်သား ၄ သိန်းမှ ၅ သိန်းဝန်းကျင်ကို နေရပ်မပြန်ဘဲ ထိုင်းနိုင်ငံအတွင်း၌ပင် MOU သက်တမ်းတိုးနိုင်မည့် နည်းလမ်းများနှင့် တစ်နေရာတည်းတွင် အားလုံးဆောင်ရွက်နိုင်မည့် One Stop Service စင်တာများ ဖွင့်လှစ်ပေးနိုင်ရေးကိုလည်း ဝန်ကြီးဌာနက စီစဉ်ဆောင်ရွက်နေကြောင်း သိရသည်။