ဩစတြေးလျတွင် အလွန်အန္တရာယ်များသော H5N1 ကြက်ငှက်တုပ်ကွေး ရောဂါပိုးရှိသည့် ဒုတိယမြောက် တောရိုင်းငှက်တစ်ကောင် ထပ်မံတွေ့ရှိ

ဩစတြေးလျနိုင်ငံ အနောက်ပိုင်းတောင်ပိုင်းရှိ ကမ်းခြေတစ်ခုတွင် ပြီးခဲ့သည့် ကြာသပတေးနေ့က နာမကျန်းဖြစ်နေစဉ် တွေ့ရှိခဲ့ရသည့် မြောက်ပိုင်း ပင်လယ်စင်ရော် (အသိုက်ပြောင်း) ငှက်တစ်ကောင်ကို စစ်ဆေးခဲ့ရာ အလွန်အန္တရာယ်များသော H5N1 ကြက်ငှက်တုပ်ကွေး ရောဂါပိုး တွေ့ရှိရကြောင်း အာဏာပိုင်များက အတည်ပြုခဲ့သည်။ ဩစတြေးလျ စိုက်ပျိုးရေး၊ ငါးလုပ်ငန်းနှင့် သစ်တောရေးရာဝန်ကြီး ဂျူလီ ကောလင်းစ် က ယင်းငှက်သည် နိုင်ငံအတွင်း တွေ့ရှိရသည့် ဒုတိယမြောက် ရောဂါပိုးရှိ အသိုက်ပြောင်းငှက်ဖြစ်ကြောင်း ပြောကြားခဲ့သည်။