တောင်ကိုရီးယား၏ ဆမ်ဆောင်း HBM ချစ်ပ်ရောင်းအားမြှင့်တင်ရေး မဟာဗျူဟာများကို ပြန်လည်သုံးသပ်

တောင်ကိုရီးယား အခြေစိုက် ဆမ်ဆောင်းအီလက်ထရွန်နစ် (Samsung Electronics) ကုမ္ပဏီသည် ပြီးခဲ့သည့်အပတ်က ကျင်းပခဲ့သော ၎င်း၏ နှစ်ပတ်လည် ကမ္ဘာလုံးဆိုင်ရာ မဟာဗျူဟာမြောက်အစည်းအဝေးတွင် AI ဆီမီးကွန်ဒက်တာဈေးကွက်အတွင်း နေရာရရှိရေးအတွက် High-Bandwidth Memory (HBM) ချစ်ပ်ရောင်းအား တိုးမြှင့်မည့် နည်းလမ်းများနှင့် အဓိကဖောက်သည်ကြီးများအကြား ရေရှည်ထောက်ပံ့ရေးသဘောတူညီချက် (Long-term supply agreements) များကို အဓိကထား ဆွေးနွေးသုံးသပ်ခဲ့ကြောင်း သိရသည်။ဆမ်ဆောင်း၏ ကိရိယာပိုင်းဆိုင်ရာဖြေရှင်းမှု (Device Solution) ဌာနအကြီးအကဲ Jun Young-hyun ဦးဆောင်၍ ပြုလုပ်ခဲ့သော အဆိုပါအစည်းအဝေးတွင် Nvidia၊ AMD နှင့် Google ကဲ့သို့သော ကမ္ဘာ့ထိပ်တန်းနည်းပညာကုမ္ပဏီကြီးများထံ HBM ရောင်းအားမြှင့်တင်ရန် ဆွေးနွေးခဲ့ကြခြင်းဖြစ်သည်။ AI အခြေခံအဆောက်အအုံ လိုအပ်ချက်များ မြင့်တက်လာခြင်းကြောင့် ကမ္ဘာ့နည်းပညာကုမ္ပဏီများသည် တည်ငြိမ်သော ချစ်ပ်ထောက်ပံ့မှုရရှိရန် ကြိုးပမ်းနေကြရာ၊ ဆမ်ဆောင်းအနေဖြင့်လည်း ဈေးကွက်ဝယ်လိုအားကို ပိုမိုကောင်းမွန်စွာ စီမံခန့်ခွဲနိုင်ရန် ရေရှည်စာချုပ်များအပေါ် ပိုမိုအာရုံစိုက်လာခြင်း ဖြစ်သည်။ ကုမ္ပဏီသည် ပြီးခဲ့သည့် ဖေဖော်ဝါရီလက ကမ္ဘာ့ပထမဆုံးအကြိမ်အဖြစ် HBM4 ချစ်ပ်များကို အမြောက်အမြား စတင်ထုတ်လုပ်ဖြန့်ချိခဲ့ပြီး၊ ပြီးခဲ့သည့်လတွင်လည်း သတ္တမမြောက်မျိုးဆက်ဖြစ်သော HBM4E နမူနာများကို စက်မှုလုပ်ငန်းအတွင်း ပထမဆုံးအကြိမ်အဖြစ် စတင်ပေးပို့နိုင်ခဲ့ကြောင်း သိရသည်။