ထိုင်းစီးပွားရေးကူးသန်းရောင်းဝယ်ရေးဝန်ကြီးဌာနသည် နိုင်ငံခြားသားများနှင့် ဆက်နွှယ်နေသည့် တရားမဝင်အမည်ခံ (Nominee) လုပ်ငန်းများကို တစ်နိုင်ငံလုံးအတိုင်းအတာဖြင့် နှိမ်နင်းလျက်ရှိရာ၊ ဘန်ကောက်မြို့ Huai Khwang ဧရိယာအတွင်းရှိ စားသောက်ဆိုင် ၁၀၀ ကျော်ကို တာဝန်ရှိသူများက ဝင်ရောက်စစ်ဆေးခဲ့ကြောင်း သိရသည်။ထိုင်းနိုင်ငံသားများကို အမည်ခံရှယ်ယာရှင်များအဖြစ် အသုံးပြုထားသည့်အပြင် တရားမဝင် နိုင်ငံခြားသားအလုပ်သမားများကို ခန့်အပ်ထားသည်ဟူသော သတင်းများကြောင့် ယခုကဲ့သို့ ရှောင်တခင် ဝင်ရောက်စစ်ဆေးခဲ့ခြင်းဖြစ်ကြောင်း စီးပွားရေးဖွံ့ဖြိုးတိုးတက်မှုဦးစီးဌာန (DBD) ညွှန်ကြားရေးမှူးချုပ် Poonpong Naiyanapakorn က ပြောကြားသည်။လက်ရှိတွင် စုံစမ်းစစ်ဆေးရန်အတွက် တရားဝင်အဖွဲ့အစည်း ၅၃ ခု၏ အချက်အလက်များကို ငွေကြေးခဝါချမှုတိုက်ဖျက်ရေးရုံး (Amlo)၊ ရဲတပ်ဖွဲ့နှင့် အခွန်ဦးစီးဌာနတို့ထံ လွှဲပြောင်းပေးထားသည်။ ထို့ပြင် Huai Khwang ခရိုင်ရုံးမှ ရရှိထားသည့် နိုင်ငံခြားသား ပါဝင်ပတ်သက်နေသော စားသောက်ဆိုင် ၁၁၂ ဆိုင်၏ အချက်အလက်များကိုလည်း အသေးစိတ် ဆက်လက်စစ်ဆေးနေသည်။
ယခုကဲ့သို့ စစ်ဆေးမှုများကို ဘန်ကောက်မြို့ရှိ ကျန်ရှိနေသည့် ခရိုင် ၄၉ ခုတွင်လည်း ပြုလုပ်နိုင်ရန် အချက်အလက်များ တောင်းခံထားပြီး၊ စီးပွားရေးကူးသန်းရောင်းဝယ်ရေးဝန်ကြီးဌာန၏ မူဝါဒအတိုင်း ဥပဒေကို ကျော်လွှားရန် ကြိုးစားနေသည့် နိုင်ငံခြားသားလုပ်ငန်းများကို ပြတ်ပြတ်သားသား ဆက်လက်အရေးယူသွားမည်ဖြစ်ကြောင်း သိရသည်။
