စင်ကာပူနိုင်ငံရှိ မြန်မာသံရုံးသို့ နိုင်ငံကူးလက်မှတ် သက်တမ်းတိုးခြင်းနှင့် ကောင်စစ်ဆိုင်ရာကိစ္စရပ်များ ဆောင်ရွက်ရန် လာရောက်ကြမည့် မြန်မာနိုင်ငံသားများအနေဖြင့် သံရုံးပရဝဏ်အတွင်း ဝင်ရောက်ရာတွင် မြန်မာ့ယဉ်ကျေးမှုနှင့် လိုက်လျောညီထွေရှိပြီး သင့်လျော်သော အဝတ်အစားများ ဝတ်ဆင်လာကြရန် မြန်မာသံရုံး (စင်ကာပူ) က ယမန်နေ့တွင် အသိပေးနှိုးဆော်ထားသည်။ သံရုံး၏ ထုတ်ပြန်ချက်အရ အမြင်မသင့်တော်သည့် အဝတ်အစားများဖြစ်သော အင်္ကျီလည်ဟိုက်၊ စွပ်ကျယ်၊ ဘောင်းဘီအတို၊ ဘောင်းဘီအပြဲနှင့် စကတ်အတိုများ ဝတ်ဆင်၍ လာရောက်ခြင်းမပြုရန် တိုက်တွန်းထားသည်။ သံရုံးသို့ လာရောက်သူများအနေဖြင့် အဆိုပါ ဝတ်စားဆင်ယင်မှုစည်းကမ်းများကို လိုက်နာခြင်းဖြင့် ကောင်စစ်ရေးရာ လုပ်ငန်းစဉ်များကို ချောမွေ့စွာ ဆောင်ရွက်နိုင်မည်ဖြစ်ကြောင်း အသိပေးထားသည်။
