တောင်ကိုရီးယားက နိုင်ငံဖြတ်ကျော် ရာဇဝတ်မှုများကို နှိမ်နင်းရန် ထိုင်း၊ မလေးရှား ရဲတပ်ဖွဲ့များနှင့် ပူးပေါင်းဆောင်ရွက်မှု တိုးမြှင့်မည်

တောင်ကိုရီးယားနိုင်ငံသည် အရှေ့တောင်အာရှဒေသတွင်း အွန်လိုင်းငွေလိမ်လည်မှု (Scams)၊ ဆိုက်ဘာလောင်းကစားမှုနှင့် မူးယစ်ဆေးဝါးမှောင်ခိုရောင်းဝယ်မှုများ လုပ်ဆောင်နေသည့် နိုင်ငံဖြတ်ကျော် ရာဇဝတ်ဂိုဏ်းများကို နှိမ်နင်းရန် ထိုင်းနှင့် မလေးရှားနိုင်ငံတို့ရှိ တရားဥပဒေစိုးမိုးရေးအဖွဲ့အစည်းများနှင့် ပူးပေါင်းဆောင်ရွက်မှုများကို တိုးမြှင့်လုပ်ဆောင်လျက်ရှိကြောင်း ကိုရီးယားအမျိုးသားရဲတပ်ဖွဲ့ (KNPA) က ဇွန်လ ၁၇ ရက် (ယမန်နေ့) တွင် ထုတ်ပြန်ခဲ့သည်။ကိုရီးယားရဲတပ်ဖွဲ့ နိုင်ငံတကာရေးရာဗဟိုဌာနခွဲမှ ညွှန်ကြားရေးမှူးချုပ် Park Jun-sung သည် ဘန်ကောက်မြို့သို့ သွားရောက်ကာ ထိုင်းအမျိုးသားရဲတပ်ဖွဲ့မှ တာဝန်ရှိသူများနှင့် တွေ့ဆုံဆွေးနွေးခဲ့သည်။ ရာဇဝတ်ဂိုဏ်းများသည် နိုင်ငံတစ်ခုတွင် အနှိမ်နင်းခံရပါက အခြားအိမ်နီးချင်းနိုင်ငံများသို့ ရွှေ့ပြောင်းအခြေစိုက်လေ့ရှိသည့် "Balloon effect" ကို ပူးပေါင်းတားဆီးရန် နှစ်နိုင်ငံစလုံးက သဘောတူညီခဲ့ကြသည်။ ဤဆွေးနွေးပွဲတွင် အဓိကတရားခံပြေးများကို လိုက်လံဖမ်းဆီးရေး၊ ရာဇဝတ်မှုကျူးလွန်ပုံစံသစ်များကို အချက်အလက်ဖလှယ်ရေးနှင့် ပြည်ပရောက်နိုင်ငံသားများ၏ ဘေးကင်းလုံခြုံရေးတို့အတွက် ပူးပေါင်းဆောင်ရွက်မှုဆိုင်ရာ မူဘောင်များကို အဆင့်မြှင့်တင်ရန် ကတိပြုခဲ့ကြသည်။ လတ်တလောတွင် ဂျပန်နှင့် ထိုင်းရဲတပ်ဖွဲ့တို့၏ ပူးပေါင်းမှုဖြင့် ကိုရီးယားမူးယစ်မှောင်ခိုဂိုဏ်းချုပ် Choi Byung-min (ခေါ်) "Cheongdam CEO" ကို ထိုင်းနိုင်ငံ၌ ဖမ်းဆီးလွှဲပြောင်းနိုင်ခဲ့သလို၊ ဆိုးလ်မြို့တွင် ဖမ်းဆီးရမိခဲ့သည့် ထိုင်းမူးယစ်ရာဇာ Thapanan (ခေါ်) "Noo Chen" ကိုလည်း ထိုင်းနိုင်ငံသို့ ပြန်လည်လွှဲပြောင်းပေးနိုင်ခဲ့သည့် အောင်မြင်မှုများ ရှိခဲ့သည်။ထို့ပြင် ကိုရီးယားရဲတပ်ဖွဲ့သည် မလေးရှားနိုင်ငံနှင့်လည်း အလားတူ နိုင်ငံဖြတ်ကျော်ငွေလိမ်လည်မှုဂိုဏ်းများကို နှိမ်နင်းရန်၊ တရားခံပြေးများအား ဖမ်းဆီးလွှဲပြောင်းရန်နှင့် ရာဇဝတ်မှုမှရရှိသော ငွေကြေးများကို ပိတ်ဆို့သိမ်းဆည်းရန် နားလည်မှုစာချွန်လွှာ (MOU) ရေးထိုးကာ လုပ်ငန်းစဉ်များကို တိုးမြှင့်လုပ်ဆောင်လျက်ရှိကြောင်း သိရသည်။