ယူအေအီးအစိုးရက ကမ္ဘာ့အကြီးဆုံး လေကြောင်းဗဟိုချက်ဖြစ်လာမည့် Al Maktoum လေဆိပ်စီမံကိန်းအတွက် ဒိုင်ဟမ် ၁၃ ဘီလီယံဖိုး စာချုပ်များ ချုပ်ဆိုပြီးစီး

ဒူဘိုင်းမြို့တော်ရှိ Al Maktoum အပြည်ပြည်ဆိုင်ရာလေဆိပ် (Al Maktoum International Airport) ကို ကမ္ဘာ့အကြီးဆုံး လေကြောင်းဗဟိုချက်ကြီးအဖြစ် တိုးချဲ့မည့် စီမံကိန်း၏ ပထမအဆင့် (Phase 1) မှာ သတ်မှတ်ကာလအတိုင်း အရှိန်အဟုန်ဖြင့် အကောင်အထည်ဖော်လျက်ရှိရာ၊ လက်ရှိတွင် ဒိုင်ဟမ် ၁၃ ဘီလီယံ ($၃.၅၄ ဘီလီယံခန့်) တန်ဖိုးရှိ လုပ်ငန်းပက်ကေ့ဂျ်များကို စတင်လုပ်ဆောင်နေပြီဖြစ်ကြောင်း ဒူဘိုင်းအိမ်ရှေ့မင်းသား Sheikh Hamdan က ထုတ်ပြန်ကြေညာလိုက်သည်။ လွန်ခဲ့သည့် ၁၅ လတာကာလအတွင်း လုပ်ငန်းခွင်လုပ်ဆောင်မှု နာရီပေါင်း ၁၀ သန်းကျော် ပြီးစီးခဲ့ပြီး ဖြစ်သည်။ယခုပထမအဆင့်တွင် စတုရန်းမီတာ ၁.၅ သန်းခန့် ကျယ်ဝန်းမည့် အဆောက်အအုံများ၏ အခြေခံကိုယ်ထည်တည်ဆောက်မှုများ၊ တောင်ဘက် လေယာဉ်ကွင်းဧရိယာ အခြေခံအဆောက်အအုံများနှင့် လျှပ်စစ်ဓာတ်အားပေးစက်ရုံများ ပါဝင်သည်။ စီမံကိန်း၏ ပထမအဆင့်ကို ၂၀၃၂ ခုနှစ်တွင် စတင်ဖွင့်လှစ်ပြေးဆွဲရန် ရည်မှန်းထားပြီး၊ ရှေ့လာမည့် လပိုင်းအတွင်း အနောက်ဘက် ခရီးသည်တင် တာမီနယ်အဆောက်အအုံ၊ ခရီးသည်ပို့ဆောင်ရေး ရထားစနစ် (APM) နှင့် ခရီးဆောင်အိတ် ကိုင်တွယ်မှုစနစ်တို့အတွက် နောက်ထပ် ဒိုင်ဟမ် ၅၅ ဘီလီယံကျော် တန်ဖိုးရှိ မဟာဗျူဟာမြောက် လုပ်ငန်းစာချုပ်များကို ထပ်မံချပြသွားမည်ဖြစ်သည်။ စီမံကိန်းတစ်ခုလုံး ရာနှုန်းပြည့်ပြီးစီးပါက အဆိုပါလေဆိပ်သည် လွတ်လပ်စွာပြေးဆွဲနိုင်မည့် ပြေးလမ်း ၅ ခု၊ တာမီနယ် ၂ ခု၊ လေယာဉ်ရပ်နားစခန်း ၄၃၀ ကျော်ဖြင့် တစ်နှစ်လျှင် ခရီးသည် သန်း ၂၆၀ နှင့် ကုန်စည်တန်ချိန် ၁၂ သန်းအထိ လက်ခံနိုင်မည်ဖြစ်ကြောင်း သိရသည်။