ထိုင်းတော်ဝင်မိသားစု၏ ဓာတ်ပုံများကို AI ဖြင့် ပြုပြင်ဖန်တီးပြီး လူမှုကွန်ရက်တွင် မျှဝေပါက ထောင်ဒဏ် ၅ နှစ်အထိ အရေးယူနိုင်ကြောင်း သတိပေး

ထိုင်းနိုင်ငံ ပြည်တွင်းလုံခြုံရေးဆိုင်ရာ ပူးပေါင်းဆောင်ရွက်မှုဌာန (ISOC) က အများပြည်သူကို ထိုင်းတော်ဝင်မိသားစုနှင့် ပတ်သက်၍ AI နည်းပညာသုံး ပြုပြင်ဖန်တီးထားသည့် သတင်းအချက်အလက်အမှားနှင့် ဓာတ်ပုံများကို လူမှုကွန်ရက်ပေါ်တွင် မမျှဝေကြရန် ပြင်းထန်စွာ သတိပေးလိုက်သည်။ မကြာသေးမီက ကွယ်လွန်သူ မင်းသမီး Bajrakitiyabha ၏ ရုပ်ကလာပ်တော် သယ်ဆောင်သည့် အခမ်းအနားတွင် ဘုရင်နှင့် မိဖုရားတို့ ပါဝင်နေသည့် ပုံစံမျိုး AI ဖြင့် မမှန်မကန် ဖန်တီးထားသည့် ဓာတ်ပုံများ ပျံ့နှံ့နေပြီး၊ ယင်းကဲ့သို့ လူထုကို အထင်အမြင်လွဲမှားစေမည့် အကြောင်းအရာများကို ကွန်ပျူတာစနစ်ထဲ ထည့်သွင်းခြင်း သို့မဟုတ် ထပ်ဆင့်မျှဝေခြင်းများသည် ၂၀၀၇ ခုနှစ် ကွန်ပျူတာဆိုင်ရာ ပြစ်မှုဆိုင်ရာဥပဒေအရ အမြင့်ဆုံး ထောင်ဒဏ် (၅) နှစ် သို့မဟုတ် ငွေဒဏ် ဘတ် (၁) သိန်း၊ သို့မဟုတ် ဒဏ်နှစ်ရပ်လုံး ချမှတ်ခံရနိုင်ကြောင်း သိရသည်။ ထို့ကြောင့် အများပြည်သူအနေဖြင့် လူမှုကွန်ရက်ပေါ်ရှိ သတင်းများကို မမျှဝေမီ သေချာစွာ စဉ်းစားဆင်ခြင်ရန်နှင့် တော်ဝင်နန်းတွင်းဦးစီးဌာန သို့မဟုတ် ခိုင်လုံသော သတင်းမီဒီယာများတွင် စိစစ်ပြီးမှသာ တာဝန်ယူမှုရှိရှိ အသုံးပြုကြရန် ISOC က တိုက်တွန်းထားသည်။