ကမ္ဘောဒီးယားနိုင်ငံကအွန်လိုင်းလိမ်လည်မှုဂိုဏ်းများနှင့် ဆက်နွှယ်သည့် တရုတ်နိုင်ငံသား ၅၀၆ ဦးကို ပြည်နှင်ဒဏ်ပေး

ကမ္ဘောဒီးယားနိုင်ငံ လူဝင်မှုကြီးကြပ်ရေးဦးစီးဌာန (GDI) သည် အွန်လိုင်းလိမ်လည်မှု (Online Scam) လုပ်ငန်းများတွင် ပါဝင်ပတ်သက်မှု၊ တရားမဝင် နေထိုင်မှုနှင့် အလုပ်လုပ်ကိုင်မှုတို့ဖြင့် ဖမ်းဆီးရမိထားသော တရုတ်နိုင်ငံသား ၅၀၆ ဦး (အမျိုးသမီး ၃ ဦးအပါအဝင်) ကို ၂၀၂၆ ခုနှစ်၊ မေလ ၇ ရက်နေ့ နံနက်ပိုင်းတွင် ပြည်နှင်ဒဏ်ပေးလိုက်ပါသည်။ အဆိုပါ ပြည်နှင်ဒဏ်ပေးမှုကို ပြည်ထဲရေးဝန်ကြီးဌာန၏ ညွှန်ကြားချက်ဖြင့် ဆောင်ရွက်ခဲ့ခြင်းဖြစ်ပြီး၊ ဖမ်းဆီးရမိသူများကို Techo အပြည်ပြည်ဆိုင်ရာလေဆိပ်မှတစ်ဆင့် အထူးလေယာဉ်ဖြင့် တရုတ်နိုင်ငံသို့ ပြန်လည်ပို့ဆောင်ခဲ့ခြင်း ဖြစ်ပါသည်။ ဤလုပ်ဆောင်ချက်သည် ဝန်ကြီးချုပ် ဟွန်မာနက် (Hun Manet) အစိုးရလက်ထက်တွင် ကမ္ဘောဒီးယားနိုင်ငံအတွင်းရှိ ဆိုက်ဘာရာဇဝတ်မှု ကွန်ရက်များကို အမြစ်ပြတ်ချေမှုန်းရန် ကြိုးပမ်းနေသည့် စီမံချက်၏ တစ်စိတ်တစ်ပိုင်းဖြစ်ပြီး၊ အဓိကအားဖြင့် ဂိုဏ်းခေါင်းဆောင်များကို ပစ်မှတ်ထား နှိမ်နင်းနေသကဲ့သို့ လိမ်လည်ခံရပြီး ရောက်ရှိလာသည့် သားကောင်များကိုလည်း ၎င်းတို့၏ နေရပ်ရင်းနိုင်ငံများသို့ ဘေးကင်းစွာ ပြန်နိုင်ရန် ကူညီပေးလျက်ရှိကြောင်း သိရပါသည်။