ယူအေအီး အရပ်ဘက်လေကြောင်းအာဏာပိုင်အဖွဲ့ (GCAA) သည် နိုင်ငံအတွင်းရှိ လေကြောင်းပျံသန်းမှုအားလုံးကို ၂၀၂၆ ခုနှစ်၊ မေလ ၂ ရက်နေ့မှစတင်၍ ပုံမှန်အတိုင်း ပြန်လည်လည်ပတ်ခွင့်ပြုလိုက်ပြီဖြစ်ကြောင်း ကြေညာလိုက်ပါသည်။ အရှေ့အလယ်ပိုင်းစစ်ပွဲ (အီရန်စစ်ပွဲ) ကြောင့် ပြီးခဲ့သည့် ဖေဖော်ဝါရီလ ၂၈ ရက်နေ့မှစတင်၍ ချမှတ်ထားခဲ့သော ယာယီလုံခြုံရေးနှင့် ကြိုတင်ကာကွယ်ရေးဆိုင်ရာ လေကြောင်းကန့်သတ်ချက်များကို ယခုအခါ အားလုံးရုပ်သိမ်းလိုက်ခြင်း ဖြစ်ပါသည်။
အဆိုပါဆုံးဖြတ်ချက်ကို လုံခြုံရေးနှင့် လုပ်ငန်းလည်ပတ်မှုဆိုင်ရာ အခြေအနေများကို ဘက်စုံစစ်ဆေးသုံးသပ်ပြီးနောက် သက်ဆိုင်ရာအဖွဲ့အစည်းများနှင့် ညှိနှိုင်း၍ ချမှတ်ခဲ့ခြင်းဖြစ်ပြီး၊ လေကြောင်းလုံခြုံရေး အမြင့်ဆုံးရှိစေရန်အတွက် အချိန်နှင့်တစ်ပြေးညီ ဆက်လက်စောင့်ကြည့်သွားမည်ဟု ဆိုပါသည်။ ဤရုပ်သိမ်းမှုကြောင့် Emirates နှင့် Etihad ကဲ့သို့သော လေကြောင်းလိုင်းများသည် ၎င်းတို့၏ ပျံသန်းမှုစွမ်းရည်ကို ၈၀ ရာခိုင်နှုန်းဝန်းကျင်အထိ ပြန်လည်မြှင့်တင်နိုင်တော့မည်ဖြစ်ကာ ခရီးသွားများအတွက် စစ်ပွဲကြောင့်ဖြစ်ပေါ်ခဲ့သော လေကြောင်းခရီးစဉ် ပြတ်တောက်မှုနှင့် လမ်းကြောင်းလွှဲပြောင်းမှုဆိုင်ရာ အခက်အခဲများ လျော့နည်းသွားမည်ဖြစ်ကြောင်း သိရပါသည်။
